Ekibastuzda bilim berý bóliminiń burynǵy basshysy sottaldy
PAVLODAR. QazAqparat - Ekibastuz qalalyq soty laýazymdyq ókilettigin asyra paıdalandy dep aıyptalǵan sheneýnik Nurjamal Maqumovanyń isi boıynsha úkim shyǵardy, dep habarlaıdy QazAqparat.
«Sot sheshimimen aıypkerdiń bas bostandyǵy eki jylǵa shekteldi jáne ómir boıyna memlekettik qyzmette, jergilikti ózin-ózi basqarý organdarynda, Ulttyq bankte, ózge de memlekettik uıymdar men mekemelerde jáne jarǵylyq kapıtaldaǵy memleket úlesi 50 paıyzdan asatyn uıymdarda jumys isteý quqyǵynan aıyryldy», - dep habarlady Ekibastuz qalalyq sotynyń baspasóz qyzmeti Almagúl Ábildınova.
Nurjamal Maqumova óz aıybyn tolyq moıyndady. Ol QR Qylmystyq Kodeksiniń 361-baby, 2-bólimi «Óz ókilettigin asyra paıdalaný» boıynsha sottaldy. Úkim 15 táýlikten keıin óz kúshine enedi. Bul aralyqta sottalýshy úkimge qarsy shaǵym túsire alady.
A. Ábildınovanyń aıtýynsha, memlekettik aıyptaýshy sottan dál osy jaza túrin suraǵan. N.Maqumova sot zalynda bosatyldy.
Eske sala ketsek, 11 shilde kúni N.Maqumova mektep dırektorlarynan UBT-ny sátti tapsyrýǵa aqsha jınady degen kúdikpen ustaldy.
Pavlodar oblysy boıynsha jemqorlyqqa qarsy is-qımyl jónindegi ulttyq bıýro departamenti tergeý basqarmasynyń basshysy Rýslan Kývatovtyń málimdeýinshe, qalada júıeli túrde aqsha jınalyp kelgen jáne bul iske qaladaǵy barlyq jalpy bilim berý mekemeleri qatysqan. Ár mektep dırektory bilim mekemesiniń Ulttyq biryńǵaı testileýdi sátti tapsyrýy úshin 100 000 teńgeden ótkizgen. Buǵan qosa, qylmystyq iske bilim bóliminiń basqa da qyzmetkerleri tartylǵan.
