Ekibastuzda balabaqshadan qashyp ketken 4 jasar qyzdy polıtseıler taýyp aldy
EKІBASTUZ. QazAqparat - Ekibastuz qalasynda №22 balabaqshadaǵy kúndizgi serýen kezinde tórt jasar qyz bala belgisiz baǵytta ketip qalǵan, dep habarlaıdy QazAqparat pavlodarnews.kz agenttigine silteme jasap.
Bul týraly Instagram-daǵy @poleznyi_ekibastuzets paraqshasynda habarlandy. Qalalyq bilim bóliminiń basshysy Jazıra Hamzabaevanyń aıtýynsha, saǵat 11:45-te orta toptyń balalary serýennen oralyp, túski as ýaqyty bastalǵan. Osy kezde aýysymdaǵy tárbıeshiler aýysyp, tústen keıin jumys isteıtin qyzmetker kelgen.
«Birinshi aýysymda jumys istegen Aıtjan Shaımerdenova áriptesine joǵalyp ketken bala týraly habarlamaı, úıine ketip qalǵan», - dedi qalalyq bilim bóliminiń basshysy.
Kúndizgi saǵat 12:00 shamasynda «Ýaq» dúkeniniń janynda jalǵyz ózi júrgen kishkentaı qyz polıtseıler nazaryna túsip, tártip saqshylary ony polıtsııa bólimine ákelgen. Balany taýyp alǵandary jóninde polıtseıler bilim bólimine habarlaǵan.
«Biz balany qaladaǵy balabaqshalar tiziminen izdestirdik», - dedi Jazıra Hamzabaeva.
Sońynda «Balbóbek» balabaqshasynyń jetekshisi men ájesi kelip, qyz balany alyp ketti. Balabaqshanyń basshysy Leıla Orazbaeva men tárbıeshi Aıtjan Shaımerdenova jumystan bosatylyp, mekeme bilim bóliminiń qatań baqylaýyna alyndy.
Eske salaıyq, bir aı buryn alty jastaǵy búldirshin balalar úıindegi janýaryn kórý úshin pavlodarlyq №27 balabaqshadan qashyp ketken bolatyn.
