Ekibastuzda áıel páter tonaýǵa túsken eki er adamdy ustap berdi
PAVLODAR. QazAqparat - Ekibastuz turǵynynyń qyraǵylyǵynyń arqasynda urylar jyldam qolǵa tústi, dep habarlaıdy «QazAqparat» HAA tilshisi.
«Túngi 22:00 shamasynda Júsipov kóshesindegi kópqabatty úılerdiń janynan ótip bara jatqan áıel jaryǵy sónip turǵan terezeden páterdiń ishinde bireýdiń qolshammen júrgenin baıqaıdy. Birden kúdiktengen ol polıtsııaǵa qońyraý shalǵan. Atalǵan mekenjaıǵa jyldam jetken tártip saqshylary, páterdiń esigine qońyraý shalady. Esikti eshkim ashpasa da, ishte bireýdiń júrgeni anyq estilip turǵan», - dep habarlaıdy oblystyq ІІD baspasóz qyzmeti.
Úıdi aınalǵan polıtseıler kúdiktiniń balkonnan sekirmek bolyp jatqanyn baıqaıdy. Tártip saqshylaryn kórgen ury qaıtadan ishke kirip ketken. ІІB qyzmetkerleri ekige bólinip, balkon men esikti qatar ańdýǵa kirisedi. Kúdiktiler esikti ishten jaýyp alǵan.
Polıtseıler eki kúdiktini qolǵa túsirdi. Páter tonamaq bolǵan eki er adam qamaýǵa alyndy. ІІB basshylyǵy qyraǵylyǵy úshin qala turǵynyn alǵys hatpen jáne qarjylaı syıaqymen marapattady.
