Ekibastuzda áskerı bılet satpaq bolǵan ınspektor sottaldy
«Sybaılas jemqorlyqqa qarsy kúres agenttiginiń Pavlodar oblysy boıynsha departamenti Ekibastuz Qorǵanys isteri bóliminiń ınspektory B. Qasymbaevqa qatysty tergeý amaldaryn aıaqtady. Qasymbaev óziniń qyzmettik ókilettigin paıdalanyp, «áskerı bılet alyp beremin» dep jedel áskerı qyzmet shaqyrylýshysynan 800 myń teńge para alǵan. 6 tamyz kúni Semeı garnızony áskerı sotynyń úkimimen Qasymbaevqa 7,6 mln teńge aıyppul salyndy», delingen habarlamada.
Aıyppul úkim óz kúshine engen sátten soń, 3 aı merzimde tólenýi tıis. Tólenbegen jaǵdaıda jaza bas bostandyǵynan aıyrý túrine aýystyrylady.
Sottalýshy «Aǵa serjant» áskerı sheninen aıyryldy jáne memlekettik qyzmette laýazymdy qyzmet atqarý quqyǵynan aıyryldy.
Eske sala ketsek, áskerı bılet satpaq bolǵan Ekibastuz qalasynyń ınspektory mamyr aıynyń sońynda ustalǵan edi.