Ekibastuzda 72 otbasy jańa páter kiltin aldy

ASTANA. QazAqparat – Pavlodar oblysy Ekibastuz qalasynda 72 páterlik turǵyn úı paıdalanýǵa berildi. Bul úı «AMANAT» partııasynyń óńirlik saılaýaldy baǵdarlamasy aıasynda salynǵan, dep habarlaıdy QazAqparat tilshisi.

Páter kiltin Pavlodar oblystyq máslıhatynyń tóraǵasy, «AMANAT» partııasy Pavlodar oblystyq fılıalynyń tóraǵasy Ilıa Terenchenko jáne Ekibastuz qalasynyń ákimi Aıan Beısekın tabystady.

«Kenshiler qalasynda qurylys qarqyny ósip, damyp keledi. Jaqyn arada 72 páterlik taǵy bir turǵyn úı jalǵa beriledi. 2027 jyldyń sońyna deıin Ekibastuzda 528 páterlik 8 úıdi salý jáne ony tapsyrý josparlanǵan», - dedi Ilıa Terenchenko.

Jańa páterler bul kúndi jyldar boıy kútken kezektegi jandarǵa berildi. Baspanaǵa jetim balalar, kópbalaly jáne áleýmettik osal toptaǵy otbasylar ıe boldy. 2011 jyldan beri kezekte turǵan Gúlsim Batalova da óz páteriniń kiltin aldy.

«Bul - meniń alǵashqy páterim. Munda ulymmen birge turamyn. Qýanyshymdy aıtyp jetkize almaımyn. Úıdi tezirek tapsyrýǵa kómektesken jadarǵa alǵysymyzdy bildiremiz», - dedi ol.

Aıta keteıik, partııanyń oblystyq saılaýaldy baǵdarlamasyna sáıkes, 2027 jyldyń sońyna deıin óńirde 15 myń páter salý josparlanǵan. Budan basqa, turǵyn alaptarda jeke úıler salý úshin keminde 1,3 myń jer ýchaskesi beriledi. Aldaǵy 5 jyl ishinde barlyǵy 20 myńǵa jýyq otbasy turǵyn úımen qamtamasyz etiledi.