Ekibastuzda 6 km-den astam jylý jelisi jańartylady
Bul týraly oblystyq qoǵamdyq keńes otyrysy barysynda Ekibastuz qalasynyń ákimi Aıan Beısekın málimdedi.
Birinshi baǵyt aıasynda jergilikti jylý elektr ortalyǵy jańǵyrtylady. Stantsııany jańartý jumystary aqpan aıynda bastaldy – qazirgi kezde 2 qazanagregat jóndeýden ótýde.
JEO bıýdjet esebinen, sondaı-aq úleskerler qarajaty esebinen de jóndeledi. Osylaısha, memleket qazynasynan bes ystyq sý qazandyǵyn jóndeý jumystary qarjylandyrylyp, «OAEK» AQ aqshasyna olardyń jobalyq-smetalyq qujattamasy ázirlenýde. Úleskerler sonymen qatar úsh elektr qazandyǵyn jóndeýdi jáne jalpy zaýyt jabdyqtaryny jańartýdy óz moınyna aldy.
Ekinshi baǵyt – jylý jelilerin jóndeý. Sáýirde gıdravlıkalyq synaqtardan keıin anyqtalǵan zaqymdardy joıýǵa kúsh salynady.
«Oblys ákiminiń qoldaýynyń arqasynda Ekibastuzǵa anyqtalǵan kemshilikterdi joıýǵa 1,7 mlrd teńge kóleminde qarajat bólindi. Jylý jelilerine de tekserý júrgizilip, qubyrlardyń eń tozǵan ýchaskeleri anyqtaldy. 6,4 shaqyrym jylý jelilerin jóndeý jáne salý josparlanǵan», - dedi A.Beısekın.
Budan basqa, turǵyn úı qoryn jańa jylytý maýsymyna daıyndaýǵa erekshe kóńil bólinedi. Ár úıge jaýapty adamdar taǵaıyndalyp, daıyndyq barysyn baqylaıdy.
Jalpy, bıyl oblystaǵy energııa kózderindegi negizgi 40 tehnıkany jóndeý josparlanýda. Jylýmen qamtý jelileri boıynsha 23 shaqyrym jelini qaıta qurý jáne kúrdeli jóndeý josparlanǵan.