Ekibastuzda 16 jastaǵy jasóspirimniń qolynda petarda jaryldy
ASTANA. QazAqparat - Ekibastuzda 16 jastaǵy jasóspirimniń qolynda petarda jaryldy. 11-synyp oqýshysy 3 qańtar kúni keshki saǵat segizde emhanaǵa jetkizildi, dep habarlaıdy pavlodarnews.kz.
Oblystyq densaýlyq saqtaý basqarmasy baspasóz qyzmetiniń málimetinshe, shaqyrý Bógenbaı batyr kóshesindegi kópqabatty úıden túsken.
«№18 mekteptiń oqýshysy eki qolynyń da jyrtylǵan jarasymen jaraqat pýnktine jetkizildi», - dedi basqarmanyń baspasóz hatshysy Elmıra Temirǵalıeva.
Elmıra Temirǵalıevanyń aıtýynsha, Jańa jyldy merekeleý kezinde oryn alǵan oqıǵalar saldarynan aýrýhanaǵa túsken jas adamdar kóp.
«Búgin Ekibastuzda túngi saǵat 1-de ekinshi qabattan mas kúıdegi 18 jastaǵy qyz qulady. Ol jabyq bas súıek-mı zaqymy, mı shaıqalý, ishtiń syzdap aýrýy degen dıagnozdarmen jaraqat pýnktine jetkizildi», - dedi Elmıra Temirǵalıeva.
Sonymen qatar, ótken túnde Ekibastuzdyń travmatologııalyq pýnktine eki aıaǵyn ekinshi jáne úshinshi dárejede úsik shalǵan 54 jastaǵy er adam tústi.
