Ekibastuzda 12 úıge jylý ishinara qosyldy – qala ákimi

ASTANA. QazAqparat – Ekibastuz qalasynda 12 kópqabatty turǵyn úıge jylý ishinara berildi. Bul týraly qala ákimi Aıan Beısekın málim etti, dep habarlaıdy QazAqparat tilshisi.

«Qazir 12 úıde jylý batareıalaryn ornatý jumysy júrip jatyr. Buǵan deıin 2 myńǵa jýyq batareıa ornatyldy, qoımada taǵy 4 myńnan astam jylý batareıasy bar. Qalǵan úılerge jylý ishinara berilip jatyr. Aıta keteıin, qalpyna keltirý jumysyna 851 adam tartyldy», - dedi Pavlodar oblysy ákiminiń mindetin ýaqytsha atqarýshy Oleg Krýk jedel shtabtyń baspasóz máslıhatynda.

Sondaı-aq, óńirdiń ýaqytsha ákiminiń aıtýynsha, shyǵyn kólemi jylý berý jumystary tolyq aıaqtalǵan soń esepteledi.

«Qazir 12 úıdiń páterlerine jylý jetkizilmegen. Degenmen atalǵan turǵyn úılerdiń keıbir páterlerine jylý qosyldy. Al 12 úı dep jalpy otyrǵan sebebimiz, barlyq páterge jylý tolyqtaı iske qosylmaǵan», - dedi Ekibastuz qalasynyń ákimi Aıan Beısekın.

Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.

Keıin jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.

Aıta ketsek, jedel shtabtyń búgin tústegi aqparatyna sáıkes, Ekibastuzdyń kópqabatty 71 problemaly úıdiń jertólesindegi toraptarǵa jylý berildi.