Ekibastuz jylý ortalyǵynyń ýchaske bastyǵy kóz jumdy, tekserý júrgizilýde

EKІBASTUZ. QazAqparat - «Ekibastuz jylý energııasy» JEO qyzmetkeri kóz jumdy. Bul týraly QazAqparat Pavlodarnews.kz silteme jasap habarlaıdy.

Aldyn ala boljam boıynsha, er adam áıelimen bolǵan janjaldan soń garajǵa ketip, sondaǵy kóligin otaldyrǵan. Keıin ol uıyqtap, gazdan ýlanyp qalǵan bolýy múmkin.

Qaza tapqan JEO ýchaskesiniń bastyǵy týraly aqparat áleýmettik jelide keń tarady. Onda qaza tapqan 33 jastaǵy er adamnyń denesi garajdan tabylǵany, onyń denesinde zorlyq izderi bolmaǵany týraly polıtsııanyń baıanaty jarııalandy.
«Ekibastuz jylý energııasy» baspasóz qyzmeti qyzmetkerdiń qaıtys bolǵanyn rastaǵan.

«4 jeltoqsan kúni «Ekibastuz jylý energııasy» JShS-ne polıtsııa basqarmasynan qaladaǵy garajdarynyń birinen kólik ishinen Ekibastuz JEO qyzmetkeriniń denesin tapqany týraly qońyraý tústi. Derekterdi tekserý kezinde olar bul shynymen ortalyq qyzmetkeri ekenin anyqtady», - dedi kásiporyn.

Al Pavlodar oblystyq polıtsııa departamentiniń málimetinshe, bul fakt qalalyq basqarmada tirkelgen, qazir tekserý júrgizilýde.