Ekibastuz JEO ýchaske basshysynyń ólimine qatysty polıtsııa túsinik berdi
«Bul fakti sotqa deıingi tergep-tekserýdiń biryńǵaı tizilimine tirkeldi. Ekibastuz qalasynyń polıtsııa basqarmasy tergeý amaldaryn júrgizip jatyr.
Sondaı-aq bolǵan oqıǵanyń mán-jaıyn aldyn ala anyqtadyq: 33 jastaǵy er adamnyń denesi Ekibastuz garajdarynyń birinde qozǵaltqyshy otalyp turǵan jeke avtokólikten tabyldy. Aldyn ala málimet boıynsha, oqıǵa otbasylyq janjal saldarynan bolǵan jáne marqumnyń qyzmetimen baılanysty emes.
Birqatar saraptama taǵaıyndaldy, olardyń nátıjesi boıynsha protsessýaldyq sheshim qabyldanady», - dep habarlady Pavlodar oblysy PD bastyǵynyń orynbasary Rashad Óteýov.
Ekibastuz JEO-nyń 33 jastaǵy ýchaske bastyǵy óz kóliginde óli kúıinde tabylǵany týraly buǵan deıin jazǵan bolatynbyz.
Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.
Keıin jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Ekibastuz qalasynyń oqýshylary onlaın oqýǵa kóshirildi.
28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.
30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.
Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestıtsııalardyń jetkiliksizdigi ataldy.
Memleket basshysynyń tapsyrmasy boıynsha Premer-Mınıstrdiń birinshi orynbasary Roman Sklıar apat saldaryn joıý jumystary aıaqtalǵansha Ekibastuzda bolatyny habarlandy.