Ekibastuz JEO-synyń tolyq isten shyqqany týraly aqparat - jalǵan

ASTANA. QazAqparat – Áleýmettik jelilerde Ekibastuzdaǵy jylý elektr ortalyǵynyń tolyq isten shyqqany týraly aqparat tarady. Bul málimet shyndyqqa janaspaıdy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasap.

«18 aqpanda saǵat 16:30-daǵy jaǵdaı boıynsha Ekibastuz JEO jelilik sý qubyryndaǵy zaqym joıyldy. Bul rette kúni boıy stantsııanyń jumysy toqtaǵan joq jáne tómendetilgen parametrlerde jumysyn jalǵastyrdy, 3 qazandyq jumys istep turdy. Pavlodar oblysynyń ákimi Asaıyn Baıhanov pen Energetıka mınıstrligi Atom jáne energetıkalyq qadaǵalaý komıtetiniń tóraǵasy Suńǵat Esimhanov - Ekibastuzda. JEO-yń mamandary qalany jylýmen jabdyqtaýdy qalpyna keltirý úshin barlyq qajetti sharalardy qabyldaýda. Stantsııanyń úzdiksiz jumysyn qamtamasyz etý jáne parametrlerdi turaqtandyrý úshin táýlik boıy negizgi jáne qosalqy jabdyqtardy jóndeý jumystary júrgiziledi», - delingen Ekibastuz qalasy ákimdiginiń Іnstagram-daǵy resmı paraqshasynda jarııalanǵan habarlamada.

Quzyrly organ málimetinshe, jóndeý jumystaryn júrgizý úshin 140 adam jumyldyrylǵan. Sonymen qatar, Ekibastuz qalasynyń ákimdigi turǵyndardy tek resmı aqparat kózderine ǵana senýge shaqyrdy.

Eske salaıyq, keshe Ekibastuzdaǵy jylý elektr ortalyǵynda jelilik sý qubyry zaqymdalǵan bolatyn. Ony jóndeý jumystary aıaqtaldy. «Ekibastuzjylýenergo» JShS málimetinshe, tolyq sýmen toltyrylǵan soń, qazandyqtar iske qosylady.