Ekibastuz JEO-na 2 760 000 teńge mólsherinde aıyppul salyndy

ASTANA. QazAqparat – Ekibastuz jylý-elektr ortalyǵynda zańbuzýshylyqtar anyqtaldy, dep habarlaıdy QazAqparat QR Saýda jáne ıntegratsııa mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, 2023 jylǵy qańtarda QR Saýda jáne ıntegratsııa mınıstrliginiń Tehnıkalyq retteý jáne metrologııa komıtetiniń Pavlodar oblysy boıynsha departamenti Ekibastuz qalasynyń prokýratýrasymen birlesip, Ekibastuz jylý-elektr ortalyǵynda metrologııa salasyndaǵy zańnamalyq aktilerde belgilengen talaptardy saqtaý bóliginde tekserýge qatysty.

Tekserý barysynda salystyryp tekserý aralyǵy buzylǵan jáne salystyryp tekserý merzimi ótken ólsheý quraldarynyń qoldanylǵany anyqtaldy. Mysaly: tehnıkalyq manometrler, qysym túrlendirgishteri, voltamperfazometr, megaommetr. Ólshem quraldaryn salystyryp tekserýsiz qoldaný «Ólshem birligin qamtamasyz etý týraly» QR Zańynyń 19-babynyń 1-tarmaǵyn buzý bolyp tabylady.

Atalǵan zańbuzýshylyq jol berilgeni úshin QR ÁQBtK-niń 419-babynyń 1-bóliginiń 2-tarmaǵy boıynsha 1600 AEK - 5 520 000 teńge mólsherinde ákimshilik aıyppul salynady.

Ekibastuz qalasy Prokýratýrasynyń zańbuzýshylyqtardy joıý týraly usynysy negizinde Departament ákimshilik quqyq buzýshylyq týraly hattama toltyrdy.

Ekibastuz JEO buzýshylyq jasaý faktisin moıyndaýyna baılanysty QR ÁQBtK 811-babyna sáıkes jeti táýlik ishinde qysqartylǵan is júrgizý tártibimen 2 760 000 teńge mólsherinde ákimshilik aıyppul tóleý týraly uıǵarym shyǵaryldy.

«Qazirgi ýaqytta ákimshilik aıyppul tolyq kólemde tólendi.

Sondaı-aq Departament Ekibastuz JEO-na qatysty zańdy buzýǵa yqpal etetin sebepter men jaǵdaılardy joıý týraly Jeke usynys shyǵardy»,-delingen habarlamada.