Ekibastuz JEO qańtar aıynyń sońyna deıin jumysyn turaqtandyrady – kásiporyn basshylyǵy
«Ekibastuzjylýenergo» JShS bas dırektorynyń mindetin atqarýshy Dmıtrıı Zaharovtyń aıtýynsha, 15 qańtar kúni tańerteń qazandyq agregattarynyń biriniń qosalqy jabdyǵy jóndelgen soń iske qosyldy. Qazirgi tańda alty qazandyq jumys isteıdi. Temperatýra 77 gradýsty quraıdy.
Úsh qazandyq jóndelip jatyr. Stantsııada jóndeý jumystary táýlik boıy júredi.
D.Zaharovtyń sózinshe, ótken jyldyń qarasha aıynyń sońynda oryn alǵan apatty jaǵdaıdy joıý barysynda jylý jelilerindegi shyǵynnyń ornyn toltyrý úshin sý arnaıy tazartýdan jáne jumsartýdan ótpesten sapasyz kúıinde berildi. Bul qala jelilerindegi jylý tasymaldaǵyshtyń aınalymyn saqtaý úshin jasaldy jáne jelidegi sýdyń úlken shyǵyny eskerilgen. Atalǵan shuǵyl sharalar sý jylytý qazandyqtarynyń jumysyna keri áserin tıgizgen.
«Saldarynan qazandyq agregattarynyń jospardan tys toqtaýy jıilep ketti. Qalǵan qazandyqtar rezervtiń bolmaýyna baılanysty tıisti reglamenttik jumystar júrgizilmesten jumys istedi. Júrgizilip jatqan jóndeý jumystary qazandyqtar boıynsha qajetti rezervti qamtamasyz etýge, negizgi jáne qosalqy jabdyqtardyń reglamenttik jumystaryn oryndaýǵa múmkindik beredi. Qańtar aıynyń sońyna qaraı tutynýshylardy jylýmen qamtý boıynsha stantsııasynyń turaqty jumys rejımi qamtamasyz etiledi», - dedi Dmıtrıı Zaharov.
Esterińizge sala keteıik, buǵan deıin «Ekibastuzjylenergo» JShS bas dırektory Vadım Lesın JEO-nyń turaqty jumys rejımin boljaý múmkin emes ekenin aıtqan edi. Oǵan sebep – jabdyqtardyń jaı-kúıi. Bul rette ol stantsııa basshylyǵy men «Pavlodarenergo» jaǵdaıdy turaqtandyrý úshin bar kúsh-jigerin salyp jatqanyna sendirdi. Jóndeý brıgadalary barlyq materıaldarmen qamtamasyz etilgen.
Ekibastuz qalasynda jóndeý jumystaryna baılanysty kópqabatty jáne jeke úıler kezeń-kezeńimen áli jylýdan ajyratylyp keledi.
27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan bolatyn.
28 qarasha kúni qalada jergilikti aýqymdaǵy tótenshe jaǵdaı jarııalandy.
Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestıtsııa jetkiliksizdigi ataldy.
7 jeltoqsanda barlyq kópqabatty úı jylýǵa qosylǵany málim boldy.
8 jeltoqsanda Prezıdent Qasym-Jomart Toqaevqa esep bergen Pavlodar oblysynyń ákimi Asaıyn Baıhanov Ekibastuzdaǵy jylý júıesin qalpyna keltirý 15 jeltoqsanǵa deıin aıaqtalatynyn aıtty. Osy kúni qalada tótenshe jaǵdaı rejımi alyndy.
12 jeltoqsanǵa deıin 4 jer úıden basqa turǵyn úılerdiń barlyǵyna jylý berildi.
Bas prokýratýra Ekibastuzdaǵy apatty tergeý eki aıǵa deıin sozylatynyn málim etti.
Foto: pavlodarnews.kz