Ekibastuz JEO-ǵa 1,1 mln teńge aıyppul salyndy
Tehnologııalyq buzýshylyqtyń sebebin anyqtaý úshin Ekibastuz JEO-da eki komıssııa quryldy. Onyń birinshisi JEO-daǵy, ekinshisi jylý jelilerindegi buzýshylyqtardy tekserdi.
Atom jáne energetıkalyq baqylaý komıtetiniń aýmaqtyq departamentiniń basshysy Rınat Kákimjanovtiń aıtýynsha, Ekibastuz JEO-da tehnologııalyq buzýshylyqtyń sebebi: hımııalyq tseh personaly qorektendirý sorǵylaryn qate qosqan. Al personaldyń atalǵan sorǵyny qosýyna ımpýlstik jeliniń qatyp qalýynan jylý jelisiniń keri qubyryndaǵy qysymdy kórsetetin elektrkontaktili manometrdiń durys kórsetpeýi sebep bolǵan.
«Ekibastuzjylýenergo» JShS jaýapqa birneshe ret tartyldy.
Aldymen, Ákimshilik kodekstiń eki baby boıynsha jazalandy. Atap aıtqanda, 300-babymen — elektr stantsııalary men jelilerin tehnıkalyq paıdalanýdyń bekitilgen erejelerin; elektr stantsııalary men jylý jelileriniń jylý mehanıkalyq jabdyqtaryn paıdalaný kezindegi qaýipsizdik tehnıkasyn; tutynýshylardyń elektr qondyrǵylarynyń tehnıkalyq eksplýatatsııasyn; energııa tutynýdyń belgilengen rejımderin buzǵany úshin. 301-2-shi babymen – tehnologııalyq buzýshylyqtar týraly aqparat berý týraly talaptardy buzǵany úshin.
Osydan keıin JShS jospardan tys tekserý kezinde jaýapkershilikke tartyldy. Máselen, Ákimshilik quqyq buzýshylyq týraly kodekstiń 300-baby – «Jylý jelilerin tehnıkalyq eksplýatatsııalaýdyń bekitilgen erejelerin buzǵany» úshin aıyppul arqalady.
Іster qysqartylǵan is júrgizý tártibimen qaraldy. Salynǵan aıyppuldar somasy 1 110 750 teńgeni qurady.
Eske sala keteıik, ótken jyly 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.
28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.
Bas prokýratýra Ekibastuzdaǵy apatty tergeý eki aıǵa deıin sozylatynyn málim etti.
Sonymen qatar, Úkimettiń keńeıtilgen otyrysyna qatysqan Prezıdent Qasym-Jomart Toqaev Ekibastuz turǵyndaryna jylý jelisindegi apattyń shyǵyndaryn memleket pen JEO ıesi bólip tólesin dep tapsyrma berdi.
Ekibastuzda jylý jelilerindegi jumystar osy kúnge deıin jalǵasyp jatyr.