«Ekibastuz-Semeı-Óskemen» jáne «Semeı-Aqtoǵaı-Taldyqorǵan-Almaty» baǵyttarynda joǵary voltty jeliler salynady

ASTANA. QazAqparat - Búgin QR Prezıdenti Nursultan Nazarbaev Qazaqstan halqyna dástúrli jyl saıynǵy Joldaýynda elimizdiń óńirlerindegi energııa tapshylyǵy máselesin sheshetin baǵytty jarııa etti.

Energetıkalyq ınfraqurylymdy damytý máselesine toqtalǵan Prezıdent «ótken bes jylda ındýstrııalandyrý baǵlarlamasy aıasynda energetıkada úlken jumystar atqaryldy. Degenmen de magıstraldy jelilerdiń shekteýli bolýy eldiń ońtústik óńirlerinde elektr energııasynyń, al ortalyq jáne shyǵys oblystarda tabıǵı gazdyń tapshylyǵyn týdyrady», - dedi.

Osy oraıda Elbasy eki baǵytta jumylyp jumys isteý kerektigin atap ótti.

«Ekibastuz-Semeı-Óskemen» jáne «Semeı-Aqtoǵaı-Taldyqorǵan-Almaty» baǵyttarynda joǵary voltty jelilerdi salý kerek. Bul óz kezeginde qazaqstandyq elektr stansalarymen elimizdiń barlyq óńirlerin teńgerimdi energııamen qamtamasyz etýdi qurýǵa múmkindik beredi», - dep túıdi Memleket basshysy.