Ekibastuz mańynda poıyz avtobýspen soqtyǵysty
PAVLODAR. QazAqparat - Pavlodar oblysynda júk poıyzy avtobýspen soqtyǵysty, dep habarlaıdy «QazAqparat» HAA QR Bas kólik prokýratýrasynyń baspasóz qyzmetine silteme jasap.
«2018 jyldyń 2 maýsymy kúni saǵat 20:20-da Pavlodar oblysynyń Ekibastuz qalasynan 36 km qashyqtyqta jatqan «Úshqulyn» jol ótkelinde «Úshqulyn-Pavlodar» baǵytymen jyljyp bara jatqan poıyz ben ishinde jergilikti kásiporyndardyń biriniń 11 jolaýshysy bar avtobýsy soqtyǵysty. Úsh jolaýshy jeńil jaraqat alyp, olarǵa medıtsınalyq kómek kórsetildi. Kólikterdiń soqtyǵysýyna baılanysty teserý júrgizilip jatyr. Ol QR Bas kólik prokýratýrasynyń basty nazarynda»,-dedi vedomstvo ókilderi.
«QTJ-júk tasymaly» AQ ókilderiniń málimetinshe, oqıǵa «Úshqulyn-Toqýbaı» baǵytynyń Pavlodar-Ekibastuz bóliginde bolǵan. Júk poıyzynyń mashınısi saǵatyna 22 km qashyqtyqpen júrip kele jatyp, Paz markili avtobýstyń temirjolǵa shyǵyp ketýine baılanysty tejegishti shuǵyl túrde iske qosqan. Apattyń aldýyn alýdyń múmkindigi bolmaı, sonyń saldarynan avtobýs jol jıegine shyǵyp ketken.
«Oqıǵa ornynda jelilik ishki ister bóliminiń qyzmetkerleri jumys istep jatyr. Osy oqıǵaǵa baılanysty jazylǵan aktide kólik apatyna avtokólik júrgizýshisiniń temirjoldan óter tusta tártip saqtamaǵandyǵynan bolǵandyǵy aıtylǵan. Avtobýs júrgizýshisi oqıǵa bolǵan sátte uıaly telefonmen sóılesip, júrýge ruqsat etilmegen belgige toqtaýdy esten shyǵarǵandyǵyn moıyndady. Temirjol ótkelinde arnaıy dybys belgisi ornatylǵan jáne ol jol-kólik oqıǵasy bolǵan kezde durys jumys istep turǵan»,-dep málimdedi kompanııa ókilderi.
