Ekibastuz HQKO basshysy jaýapqa tartylyp, eki qyzmetkeri jumystan qýyldy

PAVLODAR. QazAqparat - Oblystyq memlekettik qyzmet jáne sybaılas jemqorlyqqa qarsy is-qımyl departamenti engizgen «Tsıfrlyq agent» (Digital agent) mobıldik qosymshasy arqyly sońǵy eki aıda 96 ótinish qabyldandy, dep habarlaıdy pavlodarnews.kz.

Óńirlik kommýnıkatsııalar qyzmetinde ótken baspasóz máslıhatynda departament basshysy Ádilbek Muqashev «Tsıfrlyq agent» aıasynda qabyldanǵan ótinishter boıynsha Ekibastuz qalasynda quqyq buzýshylyq anyqtalǵanyn atap ótti.

«Bul jerde elektrondyq tsıfrlyq qoltańbany zańsyz berý arqyly málimetter usynylyp, qyzmetter kórsetilgen. Halyqqa qyzmet kórsetý ortalyǵynyń bir qyzmetkeri ekinshisine zańsyz ETsQ ashyp bergen. Ol qoltańba úshinshi taraptyń qolyna túskennen soń, olar sol arqyly qoltańba ıesiniń atyna bóten azamattardy tirkegen jáne basqa da zańsyz áreketter jasaǵan»,- deıdi Ádilbek Muqashev.

  Onyń aıtýynsha, HQKO-nyń eki qyzmetkeri jumystarynan bosatylyp, basshysyna qatysty qatań tártiptik jaza taǵaıyndalǵan. Departamenttiń «Tsıfrlyq agent» mobıldik qosymshasyna qarasha aıynda Ekibastuz qalasynyń turǵynynan ótinish kelip tústi. Belgisiz bireýler qala turǵynynyń atyna óziniń ruqsatynsyz ETsQ rásimdep, bir jyl ishinde «Elektrondyq úkimet» portaly arqyly birneshe adamdy tirkep qoıǵan. Ekibastuz turǵyny halyqqa qyzmet kórsetý ortalyǵyna kelgen kezde óz baspanasynda belgisiz bireýlerdiń tirkelgenin kórgen.