Ekibastuz aýrýhanasy men perzenthanasynda temperatýra tómendegen joq

EKІBASTUZ. QazAqparat – Ekibastuz qalasynyń emdeý mekemelerinde temperatýra parametrleri saǵat saıyn baqylanady, dep habarlaıdy QazAqparat @Pavlodarnews.kz-ke silteme jasap.

Óńirlik densaýlyq saqtaý basqarmasynyń basshysy Aıdar Seıitqazınovtyń aıtýynsha, qalalyq aýrýhanadaǵy temperatýralyq rejım 20-25 gradýsty bolyp tur.

– Temperatýra kúni boıy tómendegen joq. Eshkimdi qalalyq aýrýhanaǵa kóshirgen joqpyz. 12 naýqas oblys ortalyǵyna jiberildi, olardyń jaǵdaıy ortasha. Psıhıkalyq densaýlyq ortalyǵyndaǵy temperatýra tómen bolǵan soń 26 patsıent oblystyq psıhıkalyq densaýlyq ortalyǵyna aýystyryldy – dep atap ótti oblystyń bas dárigeri.

Basqarma basshysynyń aıtýynsha, temperatýra saǵat saıyn baqylanady, ázirge jaǵdaı qalypty.

– Alańdatyn jalǵyz nárse – emhanalardaǵy temperatýra. Búgin emhanalarda qabyldaýdy 22.00-ge deıin uzarttyq, jalpy tájirıbe dárigerleri, pedıatrlar qabyldady. Erteń, dúısenbi kúni temperatýralyq rejım tómen bolǵan jaǵdaıda úıde qyzmet kórsetýge basa nazar aýdarylady, biraq emhanada da qabyldaý júrgiziledi. 27 naýqas ornalastyrylǵan perzenthanada da temperatýra rejımi birqalypty, – dep atap ótti vedomstvo basshysy.

– Olardyń barlyǵy qanaǵattanarlyq jaǵdaıda. Qajet bolsa, olardy úıge jiberýge bolady, – dedi Aıdar Seıitqazınov.

Esterińizge sala keteıik, Pavlodarǵa ómirlik qıyn jaǵdaıǵa tap bolǵan balalardy qoldaý ortalyǵynyń tárbıelenýshileri jiberildi. Qalanyń emdeý mekemeleriniń patsıentterin qaıta ornalastyrý úshin 8 kólik daıyn.
Ekibastuz JEO-daǵy jaǵdaı turaqtandy. Shtattyq rejımde bes qazandyq agregaty jumys isteıdi, onyń úsheýi – sý jylytý qazandyqtary, ekeýi – energetıkalyq.

Osyǵan deıin Ekibastuz JEO-synda apat bolyp, qala turǵyndary jylýsyz qalǵanyn jazǵan edik.

Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.

Ekibastuz qalasynyń oqýshylary onlaın oqıtyny habarlandy.