Ekibastuz aldaǵy jylytý maýsymyna qalaı daıyndalyp jatyr
«Ózderińiz bilesizder, Ekibastuz qalasy tótenshe jaǵdaıdy erlikpen eńserdi. Qazir ol qalanyń jylýmen jabdyqtaý júıesin aýqymdy túrde jańartyp jatyrmyz. Ekibastuz jylý-elektr ortalyǵynda eki qazandyq jóndelip bitti. Qalǵan segizi jóndelip jatyr. Búkil qajetti materıal men qondyrǵylar satyp alynyp qoıǵan. Qazir solardy jetkizip, ornatyp jatyr», - dedi oblys basshysy.
Saıyn Baıhanovtyń aıtýyna qaraǵanda, óńirdiń ózge qalalary men aýyldarynda da sýmen qamtamasyz etý jáne jylý taratý salalarynda birqatar joba iske asyrylmaq.
«Jyl aıaǵyna deıin aýyldardy sýmen qamtý deńgeıi 95 paıyzdan 97,8 paıyzǵa, qalalarda 96 paıyzdan 97 paıyzǵa deıin artady», - dedi aımaq basshysy.
Buǵan deıin Energetıka mınıstri Almasadam Sátqalıev Ekibastuz qalasynda 10 jylý qazandyǵy túgel jóndeletinin aıtqan bolatyn.
«Ekibastuz jylý elektr ortalyǵynyń senimdi jumysyn qamtamasyz etý sheńberinde aldaǵy jylytý maýsymynda 10 qazandyqty jóndeý kózdelgen. Qazirgi ýaqytta 7 qazandyqta jumys júrip jatyr. Kommýnaldyq menshikke qabyldanǵan 5 sý jylytý qazandyǵyn jóndeýge Úkimet rezervinen 7,4 mlrd teńge bólindi. Qalǵan 5 bý qazandyǵy, sondaı-aq qosalqy jabdyqtar, ǵımarattar men qurylystar «Orta Azııa elektr energetıkalyq korporatsııasy» aktsıonerlik qoǵamynyń esebinen jóndeledi», - degen ol.