Ekibastuz 1-MAES-tiń kúl úıindisi sanıtarlyq-qorǵaý aýmaǵynda 200 myń kóshet otyrǵyzylǵan
ASTANA. QazAqparat - 2017 jyly Ekibastuzda 1-MAES stantsııasynyń kúl úıindisi sanıtarlyq-qorǵaý aýmaǵynda 200 myń aǵash pen kóshet otyrǵyzylǵan, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde ótken baspasóz jıynynda «Bolat Nurjanov atyndaǵy Ekibastuz 1-MAES» JShS-niń bas dırektory Rysqan Svambaev aıtty.
«Jyl saıyn kúl úıindileri aýmaqtarynda shańdy azaıtý maqsatynda 30 gektar jerde topyraq qunarlyǵyn qalpyna keltirý júrgiziledi, - dedi Rysqan Svambaev. - Jeti stantsııanyń energobloktarynda elektr súzgishter ornatyldy. Sol sebepti kómir kúli az túsetin boldy. Tútindi gazdardan tazartýdyń tıimdiligi 97 paıyzdan 99,6 paıyzǵa artty».
Bas dırektordyń aıtýynsha, 2009-2017 jyldar aralyǵynda kúldiń túsýi 5 ese, ıaǵnı 6,08 g/kVt*saǵ-tan 1,22 g/kVt*saǵ-qa deıin tómendegen.
Stantsııanyń sanıtarlyq-qorǵaý aýmaǵynyń shekaralarynda qara aǵash, jıde, qaraǵan syndy 10 myń aǵash otyrǵyzylǵan. Sonymen qatar, aýa basseınin qorǵaý úshin 44,9 mln teńge, jer resýrstaryn qorǵaý úshin 83,5 mln teńge jumsalǵan.
2017 jyly qorshaǵan ortany qorǵaý sharalaryna baǵyttalǵan shyǵyn 148,424 mln teńgeni qurady. 2018 jyly maqsatta sharalar atqarý úshin 122,6 mln qarajat qarastyrylǵan.
