Eki jylda shet elderden 30 myń bas iri qara satyp alyndy
Búgin «Qazaqstan Respýblıkasynda mal sharýashylyǵyn damytýdyń ózekti máseleleri men perspektıvalary» atty taqyrypta ótken Parlamenttik tyńdaýda Aýyl sharýashylyǵy mınıstri Asyljan Mamytbekov osylaı málimdedi.
Mınıstrdiń derekterine súıensek, elimizge shetelden 2011 jyly 10 myń, 2012 jyly 12 myń bas iri qara ákelingen. Sóıtip, et baǵytyndaǵy mal basyn ákelý 2011 jyly 35 paıyzǵa, al 2012 jyly 38 paıyzǵa artyq oryndalǵan. «Aǵymdaǵy jyly 14 myń bas iri qara mal ákelý de josparlanǵan bolatyn. «QazAgro» osy kórsetilgen san boıynsha ótinimderdi maquldady. Bul rette basa aıtqym keletini, osyndaı maldy kásipkerlerdiń ózderi ákeledi, ıaǵnı iri qarany tańdaý, olardyń baǵasy men tasymaldaý sharttarynyń barlyǵy kásipkerlerdiń ózderimen aıqyndalady. Buǵan Aýyl sharýashylyǵy mınıstrligi men «QazAgro» holdınginiń esh qatysy joq. Degenmen, keıbireýler bunyń tek sýbsıdııa arqasynda ǵana oryn alyp otyrǵanyn aıtyp ta júr. Solaı bola turǵanymen, ashyǵyn aıtaıyqshy: bıznes qaı kezde memlekettik baǵdarlamalar men yntalandyrý sharalaryna dál búgingideı belsendi túrde ún qatyp edi. Osynyń ózi obektıvti tutyný jaqsarǵanyn, asyl tuqymdy mal basynyń artyp otyrǵanyn, túptep kelgende asyl tuqymdy mal ónimderine suranystyń bar ekenin bildiredi», - dedi A. Mamytbekov.