Eki jylda memlekettik aýdıt boıynsha 511,8 mlrd teńgeniń zań buzýshylyǵy anyqtaldy – mınıstrlik
«Dástúrli aýdıt protsesinen elektrondyq formatqa kóshýdiń negizgi artyqshylyqtaryna toqtalyp ótsem. Aldymen sybaılas jemqorlyq táýekeliniń aldyn alady. Sebebi ekijaq (tekserýshi jáne tekseris júretin mekeme) bir-birimen tikeleı baılanysqa túspeıdi. Aýdıt obektilerine ákimshilik júktemeniń kólemi azaıady. Sonymen qatar birneshe aýdıt obektisin bir mezgilde tekserýge múmkindik bar. Elektrondy formattyń taǵy bir basym tusy eńbek jáne ýaqyt shyǵynyn azaıtady»,- dedi QR Qarjy mınıstrligi tsıfrlandyrý jáne memlekettik qyzmetter departamentiniń dırektory Erkin Berkeshev Ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, elektrondyq aýdıt iske qosylǵannan beri (2020 jyldyń qarashasynan bastap) 1568 aýdıtorlyq is-shara ótti.
«Nátıjesinde 511,8 mlrd teńgege zań buzýshylyq anyqtaldy. 2021 jyly qashyqtan júrgizilgen aýdıtorlyq is-sharanyń úlesi 31,2%-dy quraıdy. Budan basqa «Táýekelderdi basqarý júıesi» modýlin aıta ketsem. Ol memlekettik obektilerdiń tizbesin anyqtaýǵa arnalǵan. Búgingi kúni modýlde 64 táýekel ındıkatory engizildi. Jalpy mınıstrlik qyzmetin tsıfrlandyrý bıýdjetti atqarýdyń árbir kezeńinde profılaktıkalyq aýdıt júrgizýge múmkindik berip otyr. Bul degenimiz josparlaý, kassalyq atqarý, esepti júrgizý jáne bıýdjet pen qarjylyq eseptilikti qalyptastyrý», - deıdi ol.
Sondaı-aq, Qarjy mınıstrliginiń ókili joǵaryda atalǵan 511,8 mlrd teńgege buzýshylyqtyń memlekettik mekemelerdiń bıýdjetten bólingen qarjyny ýaqtyly ıgeriýimen baılanysty ekenin aıtyp ótti. Atalǵan soma 2020 jyldan 2022 jylǵy 1 tamyz aralyǵyn qamtıdy.
Buǵan deıin mınıstrdiń orynbasary elimizde elektrondy katalogten satyp alynatyn taýarlar tiziminiń arta túsetindigin aıtqan edi.
Foto: ortcom.kz
