Eki jylda kreatıvti ındýstrııanyń ekonomıkaǵa qosatyn úlesin 5% jetkizemiz - mınıstr

ASTANA. QazAqparat – Kreatıvti ındýstrııanyń el ekonomıkasyna qosatyn úlesin 2025 jylǵa qaraı 5%-ǵa deıin ulǵaıtý josparlanyp otyr. Bul týraly Mádenıet jáne sport mınıstri Ashat Oralov málim etti, dep habarlaıdy QazAqparat tilshisi.

«Kreatıvti ındýstrııany qoldaý boıynsha jeke korporatıvti qor qurý, qarjylyq jáne qarjylyq emes sharalar, basqa da quraldar kózdeletin retteýshilik saıasattyń konsýltatıvtik qujatyn ázirleý jumysy bastaldy. Josparlanǵan sharalar esebinen kreatıvti ındýstrııanyń el ekonomıkasyna qosatyn úlesin 2025 jylǵa qaraı 5%-ǵa deıin, al shaǵyn jáne orta kásipkerlik sýbektileriniń sanyn 80 myńǵa deıin ulǵaıtý josparlanyp otyr», - dedi Ashat Oralov Úkimet otyrysynda jasaǵan baıandamasynda.

Mınıstrdiń sózine sensek, bıyl qalalardyń kreatıvtiligin aıqyndaýǵa arnalǵan zertteý júrgiziledi.

Ashat Oralov sondaı-aq bıyldan bastap halyq ártisi ataǵyn berý úrdisi qaıta oralatynyn tilge tıek etti.

«Jergilikti atqarýshy organdar jáne shyǵarmashylyq zııaly qaýymmen birlesip, Respýblıka kúnine oraı «Qazaqstannyń halyq ártisi» ataǵyn berý usynyldy. Sondaı-aq, Memleket basshysy otandyq kreatıvti ındýstrııany júıeli qoldaýdyń mańyzyn atap ótti. Osy baǵytta ekojúıeniń irgetasyn qalaıtyn ınstıtýtsıonalızatsııa jáne zańnamalyq túzetýler boıynsha keshendi jumys bastaldy», - deıdi ol.

Aıta keteıik, osyǵan deıin 2030 jylǵa qaraı otandyq fılmder prokaty 35% artatynyn habarlaǵan edik.