Eki jylda Qazaqstan maıly daqyldardy tolyqtaı óńdeý deńgeıine shyǵady
«Dástúrli astyq egisterin ósirýmen qatar, Qazaqstan maıly daqyldardy óndirýdi arttyryp keledi. Ósimdik sharýashylyǵyn ártaraptandyrýǵa baǵyttalǵan memleket saıasaty maıly daqyldar egis alqaptaryn arttyrýǵa eleýli áser etti. Eger de 2009 jyly maıly daqyldar egisteri 1,2 mln gektar bolsa, 2019 jyly 2,9 mln gektarǵa jetti», - dedi mınıstr «KazOil – 2019» III Halyqaralyq konferentsııasynda.
Osy oraıda ol búginde elimizde óndirilgen maıly daqyldar ónimi suranysqa ıe ári sapasy joǵary ekenin atap ótti.
«Turaqty suranystyń arqasynda maıly daqyldar eksporty jyl saıyn artyp keledi. Qazirgi kezde ónimniń 40 paıyzyn shıkizat kúıinde eksporttaýdamyz. Shıkizat eksporty 2018 jyly 2017 jylmen salystyrǵanda 21,6 paıyzǵa ósti, 2016 jylǵa qaraǵanda 73,4 paıyzǵa kóterilip, 1 mln tonnany qurady. Biz shıkizatty kóbirek eksporttaı alamyz, alaıda daıyn ónim eksportyn arttyrý maqsatyn qoıyp otyrmyz», - dedi S. Omarov.
Onyń sózine qaraǵanda, elimizde maıly daqyldardy óńdeıtin 52 kásiporyn bar jáne olardyń jyldyq qýaty 2 mln tonna. Bıylǵy 9 aıda tazartylǵan jáne tazartylmaǵan maıdy óndirý kólemi byltyrǵy jyldyń sáıkes kezeńine qaraǵanda 32,4 paıyzǵa artyp, 343,5 myń tonnany qurady.
Sonymen birge, elimizdiń ishki tutynýynda ósimdik maıy ımportynyń úlesi 40 paıyzǵa jýyq kórsetkishti qurap otyr. Respýblıkaǵa negizinen Reseıden kúnbaǵys maıy, sondaı-aq palma maıy Malaızııa men Reseıden jetkiziledi.
Tilshilerdiń saýalyna jaýap berý kezinde S. Omarov elimizde maıly daqyldardyń 100 paıyzyn óńdeýdiń merzimin atady.
«Aldaǵy 2-3 jylda maıly daqyldar boıynsha 100 paıyz qaıta óńdeý deńgeıine shyǵyp, tek óńdelgen ónimdi satamyz dep josparlap otyrmyz», - dedi vedomstvo basshysy.
