Eki jylda astyq qabyldaý kásiporyndarynda 130 myń tonna bıdaı «joǵalǵan» - AShM

ASTANA. 5 naýryz. QazAqparat - Aýyl sharýashylyǵy mınıstrligi astyq qabyldaý kásiporyndaryndaǵy bıdaıdyń saqtalýyna qatań baqylaý jasaıdy. Osyǵan qatysty arnaıy zań jobasy Parlamentke usynylmaqshy. Bul týraly búgin Aýyl sharýashylyǵy mınıstrliginde ótken brıfıng barysynda málim boldy.

Agroónerkásip keshenindegi memlekettik ınspektsııa komıtetiniń tóraǵasy Saqtash Qasenovtiń aıtýynsha, sońǵy eki jyl ishinde Aýyl sharýashylyǵy mınıstrligi elimizdegi 10 astyq qabyldaý kásiporyndarynda tekserý júrgizip, jalpy kólemi 130 myń tonnadan astam astyqtyń jetispeýshiligin anyqtaǵan. Toqtala ketetin jaıt, «Memlekettik qadaǵalaý jáne baqylaý týraly» zańnama normasyna sáıkes, Aýyl sharýashylyǵy mınıstrligi jarty jylda bir retten artyq agroónerkásip keshenderine josparly tekseris júrgize almaıdy. «Osyndaı jartyjyldyq tekserýsiz qalǵan aralyqtaǵy olqylyqty paıdalanǵandar astyqty zańsyz aınalymǵa shyǵaryp satyp, keıin onyń ornyn basqa astyqpen toltyrýǵa umtylyp júr. Bundaı shara júıeli túrde oryn alyp otyrǵany bir bólek, ol astyq bitik shyqpaǵan jyldardaǵy bıdaı baǵasynyń kúrt kóterilýine de septigin tıgizip jatyr», - deıdi S. Qasenov.

Osyǵan oraı, mınıstrlik zańnamadaǵy olqylyqtardy joıý úshin Parlamentke arnaıy zań jobasyn usynýdy kózdeıdi. Onda astyq qabyldaý kásiporyndaryn aıyna bir ret tekserýge ruqsat beretin normalar engizý qarastyrylady. Budan bólek, elektrondy astyq qolhaty ınstıtýtyn engizý, máselesi qaralýy kózdeledi.