Eki jyl múgedek týysqanyn zorlap kelgen aqtóbelikke úkim shyqty
AQTÓBE. QazAqparat –Aqtóbe oblysynda ІІ toptaǵy múgedek qyzdy eki jyl zorlap kelgen er adamǵa sot úkimi shyqty, dep habarlaıdy QazAqparat tilshisi.
Bıylǵy 6 qańtardaǵy sottyń qaýlysyna sáıkes qylmystyq protsestik zańnamanyń buzylýyna baılanysty is prokýratýraǵa qaıtarylǵan bolatyn.
Búgin sot túpkilikti úkim shyǵardy.
«Aqtóbe qalasynyń № 2 sotynda Qylmystyq kodekstiń 120-baby 2-bóliginiń 4-tarmaǵymen Á.Karylǵashevqa qatysty is qaraldy. Іs materıalyna súıensek, 2017 jyldyń qańtar aıy men 2019 jyldyń tamyz aıy aralyǵynda Á.Qarylǵashev óz týysynyń úıine erkin kirip, úıdiń úlkenderi bolmaǵan kezde týa bitti sal aýrýyna shaldyqqan ekinshi toptaǵy múgedek qyzdyń dármensizdigin paıdalanyp, birneshe ret zorlaǵan. Á.Karylǵashevtyń qylmystyq jaýaptylyǵy men jazasyn jeńildetetin mán-jaıy retinde kámeletke tolmaǵan balasynyń bolýy esepke alyndy. Qylmystyq jaýapkershilik pen jazany aýyrlatatyn mán-jaılar anyqtalmaǵan. Ol sot úkimimen kináli dep tanylyp, 6 jyl 8 aı merzimge bas bostandyǵynan aıyrý jazasy taǵaıyndaldy. Jazany qylmystyq- atqarý júıesiniń qaýipsizdigi ortasha mekemesinde óteıdi. Jábirlenýshiniń 2 mıllıon teńge moraldyq zııandy óteý týraly talaby tolyǵymen qanaǵattandyryldy», - dep habarlady oblystyq sottyń baspasóz qyzmetinen.
Úkim zańdy kúshine engen joq.
