Eki jolaýshy mingen ushaq AQSh-ta Gýdzon ózenine qulap ketti
ASTANA. 28 qańtar. QazAqparat - Keshe Piper PA-32 jeńil birmotorly ushaq AQSh-tyń soltústik-shyǵysynda ornalasqan Ionkers qalasynyń mańynda, Gýdzon ózenine qulap ketti.
Ushaqtyń bortynda eki adam bolǵan, dep habarlady Ýtro.rý.
Polıtsııadan berilgen aqparatqa qaraǵanda, apat jergilikti ýaqyt boıynsha saǵat 17:30-da Djordj Vashıngtonnyń kópirinen 6 shaqyrym jerde oryn aldy. Qutqarý jıletterin kıgen er adam men áıel jarty saǵattyń ishinde jaǵalaýǵa jetkizilip, aýrýhanaǵa jóneltildi.
Dárigerler zardap shekkenderdiń eshqandaı jaraqattar almaǵanyn aıtýda. Olarǵa sýyq tıgen. Qazirgi ýaqytta jaǵdaılary qanaǵattanarlyq dep baǵalanýda. Ushaqtyń apatqa ushyraý sebepteri habarlanbaı otyr.
