Eki jigit jabylǵan egde kisi tilge kelmeı kóz jumdy
ALMATY. QazAqparat - Almatyda 40 myń turatyn telefon úshin eki jigittiń shabýylyna tap bolǵan egde kisi 13 kún komada jatyp, kóz jumdy, dep habarlaıdy QazAqparat tilshisi.
59 jastaǵy Batıhan Seıdeǵalıev Almatydaǵy dúkenderdiń birinde aýla sypyrýshy bolyp jumys istegen eken.
Qapelimde ajal qushqan er adamdy jaqyndary Atyraýdaǵy týǵan aýylyna jerlep qaıtty.
Marqumnyń artynda áıeli, úsh qyzy qaldy.
Qaza bolǵan er adamnyń kúıeý balasy Ashat Aldońǵarov qaıǵyly oqıǵanyń qalaı bolǵanyn aıtyp berdi.
«Jumysqa jaıaý baratyn taza aýamen demalyp. Tańerteń 6:30 shamasynda jumysqa bara jatqanda Muratbaev pen Gogol kósheleriniń qıylysynda qarańǵylaý tusta ekeýi shyǵa kelip kúres ádisimen jambasqa laqtyryp ketken. Qolyndaǵy telefonyn tartyp alyp qashyp ketken. 40 000 teńgelik telefondy jaqynda ǵana alǵan bolatyn. Jumystan shyqpaı júrgen bolatyn, zeınetkerlikke az qaldy dep», - dedi Ashat Aldońǵarov.
Onyń aıtýynsha, soqqydan er adamnyń qos tizesimen qosa omyrtqasy synǵan, qýyǵy jarylǵan. Aýyr jaraqattan 13 kún boıy komada jatty.
Esin jıǵan Batıhan Seıdeǵalıev qos qol aıaǵy istemeı, sóıleı almaı qalǵan. Asa aýyr jaǵdaıǵa tap bolǵan er adamdy inisi Atyraýǵa alyp ketken. Marqum týǵan aýylyna jetpeı, jolda kóz jumdy.
Aıta ketý kerek, qazir Almaty polıtsııasy 19-20 jastaǵy eki jigitti ustady.
«Qazir atalǵan derek boıynsha QR QK 192-babymen sotqa deıingi tergeý jumystary júrip jatyr. Kúdiktiler kinálaryn moıyndady. Olardyń biri buryn urlyq úshin isti bolǵan", - dedi Almaly aýdandyq ІІB basshysy Danııar Mendebaev.
