Eki jambyldyq poıyzben astanaǵa esirtki jibermek bolǵan

TARAZ. QazAqparat – Kólik polıtseıleri Jambyl oblysynyń eki turǵynynan 28 keliden asa esirtki zattaryn tárkiledi, dep habarlaıdy QazAqparat tilshisi.

​«Lýgovoı stantsııasyndaǵy polıtsııa qyzmetkerleri aǵymdaǵy jyldyń 11 tamyzynda «Qarasora-2020» jedel-profılaktıkalyq is-sharasyn júrgizý barysynda T.Rysqulov aýdanynyń qumdy aımaǵynda Jambyl oblysynyń eki turǵynyn anyqtap, ustady. Tekserý kezinde olardyń árqaısynan ózine tán ıisi bar ósimdik tektes zat salynǵan bir-bir qap tabylyp, tárkilendi», - dedi Kóliktegi polıtsııa departamentiniń bastyǵy Ońal Bekeev.

Onyń aıtýynsha, quqyqbuzýshylardyń turǵylyqty jerindegi shóp qorany tintý kezinde taǵy da 1,5 qap esirtki zaty tabylǵan. Saraptama qorytyndysyna sáıkes, tárkilengen zattar jalpy salmaǵy 28 keliden asatyn marıhýana esirtki zaty bolyp shyqqan.

«Sondaı-aq kólik polıtseıleri atalǵan tulǵalar bul esirtkini qumdy aımaqtan jınap, olardy temirjol kóligi arqyly respýblıkanyń astanasy men soltústik óńirlerine tasymaldaýdy kózdegenderin anyqtady», - dedi O.Bekeev.

T.Rysqulov aýdandyq sotynyń úkimimen qaskúnemder osy qylmysty jasaǵany úshin kináli dep tanylyp, 3 jyl merzimge bas bostandyǵynan aıyrylǵan.