Eki-úsh esege qymbat satylatyn dári-dármekter baǵasy qashan baqylaýǵa alynady
«Búgin biz dári-dármekterdiń baǵasyn retteý syzbasyn tanystyrdyq. Buryn kepildendirilgen mólsher aıasynda ǵana, ıaǵnı memlekettik satyp alý arqyly baǵany rettep otyrsaq, kóterme segmentte baǵany retteıtindeı quziretimiz bolmaǵan edi. Ózderińiz biletindeı, Memleket basshysy kóterme segmentte baǵany retteýdi júktegen. Biz baǵany retteýdiń modelin ázirledik», - deıdi Alekseı Tsoı «SK Farmatsııa» JShS-da ótken dóńgelek ústel barysynda.
Onyń aıtýynsha, dári-dármekti tasymaldaýshylardyń kóbi qymbat baǵamen satyp jatqan joq. Degenmen, saýdanyń keıbir sýbektteri uıatty ysyryp qoıyp, baǵany birneshe esege kóbeıte satyp jatqan kórinedi.
«Shamamen tasymaldaýshylardyń 70 paıyzy - jaýapty ári ádil dese bolady. Kóp jaǵdaıda olar durys jumys júrgizip, baǵany kótermeıdi. Biraq, naryqtyń «tentekteri» de bar. Mine, biz ázirlep jatqan erejeler solardy tyıýdy kózdeıdi. Baǵalardyń asyrýǵa bolmaıtyn belgili bir mólsheri belgilenedi. Osylaısha, dári-dármekterdiń baǵasyn 2-3 esege deıin qymbattatý jaǵdaılary tyıylady. Máselen, dárihanalardaǵy baǵalardyń ala-qulalyǵyn ózińiz de kóre alasyz. Bizdiń mindet - baǵalardyń aýytqýy belgili bir bekitilgen dáliz ishinde bolǵanyn qamtý», - deıdi Alekseı Tsoı.
Vıtse-mınıstr bul tártiptiń kelesi jyldyń 1 qańtarynan bastap engizý kózdelip otyrǵanyn atap ótti.
«Turǵydar baǵa aıyrmashylyǵyn eshqaı jerde salystyra almaıdy - baǵalardyń reestri joq. Aldaǵy ýaqytta árbir adam dári-dármektiń baǵasyn bilip otyratyn saıt jumys isteıtin bolady. Saýdadaǵy ataýy boıynsha baǵany ózińiz tekserip otyrasyz», - deıdi vıtse-mınıstr.
Aıta ketsek, Qazaqstanda dári-dármek baǵalarynyń ala-qulalyǵyn retteıtin zań jobasy ázirlenip jatqanyn budan buryn «SK-Farmatsııa» JShS basqarma tóraǵasynyń mindetin atqarýshy Berik Shárip te aıtqan bolatyn.