Eki sábıine, ózine pyshaq saldy: Qostanaıdaǵy oqıǵanyń mán-jaıy aıtyldy
QOSTANAI. QazAqparat – Qostanaılyq kelinshek eki balasyn pyshaqtap, ózine qol jumsamaq boldy, dep habarlaıdy QazAqparat.
Oblystyq Polıtsııa departamenti oqıǵanyń mán-jaıy týraly aqparat taratty.
Belgili bolǵandaı, «102» pýltine qońyraý 15 sáýir kúni saǵat 01.17-de túsken. Áıel bir jáne úsh jasar eki sábıiniń denesin pyshaqpen tilgen. Keıin ózine pyshaq jaraqatyn salǵan. Sábıler qazir oblystyq balalar aýrýhanasynda, áıeldiń jaǵdaıy turaqty.
«Áıel sýıtsıd jasamastan buryn «Bárine qurbymdy kinálaýdy suraımyn» dep hat jazǵan. Tergeý barysynda anyqtalǵandaı, bul árekettiń sebebi qyzǵanysh negizinde paıda bolǵan. Beıimdeý ortalyǵynda turyp jatqan 26 jáne 22 jastaǵy qurbylar bir-birinen er adamdy qyzǵanyp, janjaldasyp qalǵan. Birinshisi osy áreketten soń ózine jáne balalaryna qol jumsamaq bolǵan», - dedi PD baspasóz qyzmetiniń mamany Kenje Qonysbaı agenttik tilshisine.
Tergeý málimetterine súıensek, 26 jastaǵy áıel birge turatyn er adammen 2018 jyly ajyrasqan. Oǵan sebep – jigit ózin eki balanyń ákesi ekenin moıyndamaǵan. Budan keıin, áıel balalaryn Qostanaı qalasyndaǵy «Delfın» balalar úıine tapsyrady. Ózi Qoıbaǵar aýylyna kóship ketip, jumysqa turǵan. 2019 jyldyń qańtarynda aýdanǵan kóship baryp, burynǵy súıiktisimen qaıta qosylǵan. Bir aıdan soń balalar úıinen sábılerin alyp ketken.
Biraq er adammen kóńili qaıta jaraspaı, balalarymen Qostanaıǵa kóshken. 2019 jylǵy tamyz-qazan aılarynda aldymen Qostanaıdaǵy Analar úıinde turǵan. Keıin ákimdik sheshimimen Beıimdeý ortalyǵynan bólme berilgen.
«Ol balalarǵa arnalǵan járdemaqyny turaqty alyp keldi, ortalyqta tegin turdy. Sonymen qatar ákimdik áıelge únemi kómek kórsetip otyrdy. Qazirgi ýaqytta sotqa deıingi tergeý sheńberinde áıelge psıhologııalyq-psıhıatrııalyq saraptama taǵaıyndaldy. Áıel 3 jasar qyzyna jáne 1,9 jasar ulyna pyshaq jaraqatyn salǵan. Sodan keıin óziniń bilegin kesken. Atalǵan fakti boıynsha polıtsııa QR QK 24-babynyń 3-bóligi jáne 99-babynyń 3-bóligi boıynsha («Adam óltirýge oqtalý») sotqa deıingi tergeýdi bastady. Áıeldiń ózine-ózi qol jumsaýǵa áreket etý faktisimen QR QK-niń 105-baby 1-bóligimen qylmystyq is qozǵaldy», - dedi oblystyq PD-dan.
