Eki pedofılge baqylaý qurylǵysy taǵyldy
Shymkent qalasy jáne Túrkistan oblysy boıynsha QAJ departamenti baspasóz qyzmetiniń málimetinshe, probatsııalyq baqylaýǵa alynǵan azamattyń biri - 16 jastaǵy qyzdy alyp qashqany úshin sottalǵan. Qazir jas kelinshegi bosanyp, uldy bolyp otyr.
«Men kámelet jasyna tolmaǵan qyzben otaý qurý zańǵa qaıshy ekenin endi túsindim. Ekeýmizdiń kelisimimiz boıynsha úılengen jaǵdaıda zań aldynda jaýap bermeıtin bolarmyn dep oılaǵanmyn. Sot júktegen jazamdy buzbaı ótep shyǵýǵa tyrysamyn. Kishkentaı ulyma úlgili áke bolýdy armandaımyn. Kelesi jyly áıelim 18-ge tolady. Sol kezde ekeýmiz nekemizdi qıdyramyz. Óz áıelińmen birge turyp, pedofıl ataný qıyn eken», - deıdi jazasyn óteýshi.
Qazir Shymkent qalasy men Túrkistan oblysy boıynsha sottalyp, probatsııalyq baqylaýda turǵan azamattarǵa taǵý úshin 91 elektrondy baqylaý qurylǵysy ákelindi. Mamandar olardyń birinshi kezekte pedofılderge taǵylatynyn aıtady.
Sonymen qatar, bul tizimge probatsııalyq baqylaýda turǵanyna qaramastan, kóp eskertý alǵandar men tártipke baǵynbaǵandar engiziledi. Qylmys jasaǵany úshin izdeýde júrgender ustalǵan jaǵdaıda, olarǵa da osy bilezikter taǵylmaq. Máselen, Shymkentke pılottyq úlgidegi quraldyń 49 túri ákelinip, 4 aýdanǵa bólingen. Al, Túrkistan oblysyna qarasty 16 probatsııa bólimshesine 42 elektrondy bilezik berilgen. Bul elektrondy bilezikter sottalǵandardy baqylaýǵa septigin tıgizedi.
Buǵan deıin Nur-Sultanda da 20-ǵa jýyq eseptegi sottalǵanǵa elektrondy bilezik taǵylǵan bolatyn.