Eki palataly Parlament demokratııany yntalandyrýǵa qabiletti - N. Nyǵmatýlın
ASTANA. 28 qarasha. QazAqparat - Qos palataly Parlament júıesi demokratııany yntalandyrýǵa qabiletti.
Búgin Astanada ótip jatqan «Qazaqstan Respýblıkasynyń Tuńǵysh Prezıdenti - Elbasy N. Nazarbaevtyń Qazaqstanda parlamentarızmniń qalyptasýyndaǵy róli» atty konferentsııa barysynda Májilis tóraǵasy Nurlan Nyǵmatýlın osylaı málim etti.
«Árıne, álemdegi ámbebap modelderdiń jolyn ustanatyn Qazaqstan parlamentarızminiń de ózine tán biregeı belgileriniń bolmaýy esh múmkin emes. Bul rette elimizdegi ókildik etýshi bılik ınstıtýtynyń tamyry tym tereńde jatýy da munda aıtarlyqtaı ról atqarady. Máselen, qazaqstandyq parlamentarızmniń alǵysharttaryn dala demokratııasynyń dástúrlerinen, dalalyq quryltaı ınstıtýttarynan, sondaı-aq Alash qozǵalysy lıderleriniń ıdeıalarynan kórýge bolady. Al qazaqstandyq parlamentarızmdi damytýdyń mańyzdy oqıǵasy 1995 jyly qabyldanǵan jańa Konstıtýtsııamen tikeleı baılanysty», - dedi Májilis spıkeri.
Onyń aıtýynsha, sońǵy Ata zańdy ázirleý barysyna Elbasy N. Nazarbaev tikeleı atsalysyp, keıinnen bul qujat respýblıkalyq referendýmda qabyldandy.
«Ata zańnyń jańa mátininde alǵash ret «Parlament» uǵymy bekitildi. Konstıtýtsııada Parlament zań shyǵarý fýnktsııasyn júzege asyratyn elimizdiń eń joǵarǵy ókildi organy retinde bekitildi. Ondaǵy basty jańalyq Parlament quramyn eki palataǵa bólýden turǵan edi. Osylaısha, Qazaqstan zań shyǵarýshy organy bir palatalydan eki palataly júıegi kóshti. Bul tańdaý da aıaq astynan týyndaǵan kezdeısoq jaıt emes. Óıtkeni, túrli áleýmettik-saıası, túrli ekonomıkalyq, etnıkalyq múddeleriniń ókildigi arqyly eki palataly Parlament júıesi demokratııany yntalandyrýǵa qabiletti», -dedi N. Nyǵmatýlın.
