Eki orynborlyq kásipkerdi óltirgen Qazaqstan azamaty 23 jylǵa sottaldy
ASTANA. QazAqparat - Oblystyq prokýratýranyń habarlaýynsha, úkim zańdyq kúshine engen, dep habarlaıdy oreninform.ru.
Qazaqstan Respýblıkasynyń 27 jastaǵy azamaty Rýslan Maqsatov «Jábirlenýshiniń densaýlyǵyna aýyr zııan keltirgen iri qaraqshylyq» jáne «Aldyn ala kelisim jasalǵan toptyń eki adamdy óltirýi jáne tonaýy» baptary boıynsha qylmys jasaǵany úshin aıypty dep tanyldy. Ony qatań rejımdegi túzeý kolonııasyna 23 jylǵa bas bostandyǵynan aıyrý týraly úkim shyǵaryldy.
2015 jyldyń qańtar jáne naýryz aılarynda Reseıden avtokólik satyp alýmen aınalysqan Maqsatov Orynborda zańsyz valıýta bıznesin kásip etken eki tanysyn óltirgen. Ekeýi de qaskóı mingen avtokólik ishinde travmatıkalyq tapanshadan kóz jumǵan. Ekinshi qylmysty Maqsatov óziniń jerlesimen - halyqaralyq izdeýde júrgen qylmyskermen birge júzege asyrǵan.
Eki máıitti de qala syrtyna shyǵaryp tastaǵan. Olardyń qaltasyndaǵy bar qarajatty qylmyskerler alyp ketken.
Maqsatovty Orynborǵa úshinshi ret kirgeli turǵanda jedel qyzmet polıtseıleri ustady.
Apellıatsııalyq ınstantsııa soty sottalýshy men qorǵaýshysynyń shaǵymyn qanaǵattandyrmady jáne birinshi ınstantsııa sotynyń úkimin ózgerissiz qaldyrdy.
