Eki óńirde birinshi aýysymdaǵy sabaqtar toqtatyldy
NUR-SULTAN. QazAqparat – Aýa raıynyń nasharlaýyna baılanysty eki óńirde birinshi aýysym úshin sabaqtar toqtatyldy, dep habarlaıdy QazAqparat.
Atap aıtqanda, Shyǵys Qazaqstan oblysynyń Óskemen (-28 gradýs aıaz) men Semeı qalalarynda (-23 gradýs aıaz), Altaı, (-30 aıaz) Borodýlıha (-32 aıaz) jáne Ulan (-28 aıaz) aýdandarynda, Kýrchatov qalasynda (-23 aıaz), sondaı-aq Jarma aýdanynyń (-30 aıaz) Jańǵyztóbe, Shýaq jáne Jaryq aýyldarynda 1-4 synyp aralyǵynda sabaqtar bolmaıdy.
Al Shemonaıha, (-27 gradýs aıaz), Kókpekti (-30 aıaz), Besqaraǵaı (-28 aıaz) aýdandarynda jáne Rıdder qalasynda (-27 aıaz) 1-9 synyp oqýshylary mektepke barmaıdy.
Zaısan aýdanynda kóktaıǵaqqa baılanysty 1-11 synyptar úshin oqý protsesi toqtatyldy.
Sondaı-aq Qaraǵandy oblysynyń Shet aýdanynda 0-4 synyptar oqymaıdy.
Aıta keteıik, sınoptıkter birneshe óńirde aýa raıynyń buzylatyny jóninde eskertý jarııalaǵan bolatyn.
