Eki oblystyń jylý jelilerin jańartýǵa qarajat bólý máselesi pysyqtalyp jatyr

ASTANA. QazAqparat – Eki oblystyń jylý jelilerin jańartýǵa qarajat bólý máselesi pysyqtalyp jatyr. Bul týraly Úkimet otyrysynda Indýstrııa jáne ınfraqurylymdyq damý mınıstri Marat Qarabaev aıtty, dep habarlaıdy QazAqparat tilshisi.

«Qazirgi ýaqytta Úkimet rezervinen eki óńirde – Aqmola jáne Pavlodar oblystarynda jylý jelilerin rekonstrýktsııalaýǵa jáne jańartýǵa qarajat bólý máselesi pysyqtalyp jatyr. Osy jyldyń 15 naýryzynda Ekibastuz qalasynda jalpy somasy shamamen 9,6 mlrd teńgege 4 jylý magıstralin rekonstrýktsııalaýǵa jáne Pavlodar qalasynda jylý jelileriniń jańa 5 qurylysyna 4,4 mlrd teńgege memlekettik saraptamanyń oń qorytyndysy alyndy», - dedi mınıstr.

Onyń atap ótýinshe, Úkimet rezervinen tıisti qarajatty bólý týraly qaýlynyń jobasy múddeli memlekettik organdarmen kelisý kezeńinde.

«Sondaı-aq, Stepnogorsk jáne Kókshetaý qalalary boıynsha jylý jelilerin jóndeýge Aqmola oblysy ákiminiń ótinishhaty joldandy. Búgingi tańda smetalyq qujattamalary pysyqtalyp jatyr. Jaqyn arada Qarjy mınıstrligine qoldaýhat jiberiledi», - dedi Marat Qarabaev.

Mınıstr buǵan deıin atap ótkendeı, Pavlodar, Abaı, Qaraǵandy, Shyǵys Qazaqstan jáne Soltústik Qazaqstan oblystarynda jylý jelileri kóp tozǵan.

Aıtýynsha, 2029 jylǵa qaraı jylýmen jabdyqtaý jelileriniń tozýyn 43 paıyzǵa deıin tómendetý mindeti tur.