Eki oblystyń aýmaǵyndaǵy respýblıkalyq joldarda kólik qozǵalysyna shekteýler engizildi
ASTANA. 13 jeltoqsan. QazAqparat - Búgin aıazǵa baılanysty eki oblystyń aýmaǵyndaǵy respýblıkalyq joldarda kólik qozǵalysyna shekteýler engizildi. Bul týraly «Qazaqavtojol» RMK baspasóz qyzmeti habarlaıdy.
Atap aıtqanda, saǵat 12:30-dan bastap aýa temperatýrasynyń kúrt tómendeýine baılanysty Pavlodar oblysy boıynsha barlyq baǵyttarda qoǵamdyq jáne dızel otynymen júretin avtokólikterdiń qozǵalysyna tyıym salyndy.
Budan bólek, Qaraǵandy oblysy aýmaǵynda da saǵat 15:00-den "Qyzylorda-Pavlodar" jolynyń 1069-1135 shaqyrymyndaǵy "Molodejnyı-Pavlodar oblysy shekarasy" aralyǵynda qoǵamdyq, júk jáne dızel otynymen júretin avtokólikter úshin jol jabyldy.
