Eki myńǵa jýyq Arys turǵyny qarjylaı kómek aldy
Bolat Ótemuratov qory, Qazaqstannyń «Qyzyl Aı» qoǵamy jáne ForteBank-tiń «Kómek kartasy» birlesken jobasynyń sheńberinde Arys qalasynyń 2 myńǵa jýyq turǵyny qarjylaı kómekke ıe boldy. Bólingen aqshaǵa qurylys materıaldaryn satyp alýǵa, sharýashylyq taýarlaryn túgendeýge jáne kıim-keshekti bútindeýge berilip otyr. Búgingi tańda Arys qalasynyń ákimdigi men «Qyzyl Aı» jáne Bolat Ótemuratov qory kómek alýshylardy anyqtady. Olardyń qatarynda medıtsınalyq járdemge júgingender, kópbalaly otbasylar, jalǵyzbasty analar men múgedekter bar. Atalǵan sanatqa kiretin ár otbasy múshesine 30 myń teńgeden bank kartalary tabystaldy.
Arys qalasynyń ákimi Murat Qadyrbek qor jetekshilerine qalany qalpyna keltirýge atsalysqany úshin alǵys aıtty.
«Qıyn kezeńde bizdi búkil el qoldady jáne bizge kómek qolyn usynǵan uıymdardyń biri - Bolat Ótemuratov qory boldy», – dep atap ótti qala basshysy.
Aıta keteıik, tabıǵı jáne tehnogendik apattardan zardap shekken qazaqstandyqtarǵa qoldaý kórsetý boıynsha «Kómek kartasy» jobasy 2018 jyly bastaý alǵan bolatyn. Buǵan deıin qor tarapynan Qaraǵandy, Almaty, Aqmola jáne Soltústik Qazaqstan oblystarynda úıleri kóktemgi sý tasqynynan zardap shekken turǵyndarǵa 56 mıllıon teńgeden astam somaǵa kómek kórsetildi.
