Eki márte álem rekordyn jańartqan I.Ilın jeńisin Qazaq eliniń Táýelsizdik kúnine arnady
ASTANA. QazAqparat - Búgin Groznyı qalasynda ótken Aýyr atletıka boıynsha Reseı Federatsııasy Prezıdentiniń Kýbogy úshin besinshi halyqaralyq týrnırde erler arasyndaǵy 105 kelige deıin salmaqta baq synaǵan Ilıa Ilın 2 márte álem rekordyn jańartty.
Buǵan deıin habarlaǵanymyzdaı, Ilıa alǵashqy julqa kóterý saıysynda 191 kelini baǵyndyryp, birinshi orynǵa taban tiregen bolatyn. Al ekinshi jattyǵýda ol alǵashqy múmkinshiliginde-aq qarsylastarynan oq boıy ozyq bolyp, 231 kelini baǵyndyrǵan bolatyn. Osydan keıin altyn medal Ilıanyń qanjyǵasyn maılaǵan edi. Biraq ol táýekelge baryp birden 246 kelige tapsyrys berdi jáne ony erkin eńserdi. Este bolsa, ótken jyly Almatyda ótken álem chempıonatynda Ilıa Ilın 242 kelini baǵyndyryp, álem rekordyn ornatqan bolatyn. Al araǵa bir jyl ýaqyt salyp dańqty sportshymyz óz rekordyn jańartyp otyr. Qos saıystyń nátıjesinde de Ilıa 437 keli kóterip jańa rekord ornatty. «Bul jeńisimdi elimniń Táýelsizdik kúnine arnaımyn», - dedi dańqty sportshy jarys aıaqtalǵannan keıin. Al dál osy salmaq sanatynda jarys jolyna shyqqan taǵy bir sportshymyz, álem chempıony Aleksandr Zaıchıkov julqa kóterýde 190, serpe kóterýde 226 kelini baǵyndyrdy. Osylaısha ol eki jattyǵýdyń qorytyndysynda kúmis medaldi qanjyǵasyna baılady. Úshinshi oryn eki jattyǵýda 411 keli kótergen reseılik ziltemirshi Tımýr Nanıevke buıyrdy.
