Eki kúnniń ishinde 8 adam ystan ýlanyp kóz jumdy
ASTANA. QazAqparat - Eki kúnniń ishinde ys tıip, segiz adam mert boldy. Qutqarýshylar peshpen jylytýdy qoldaný kezinde abaı bolýǵa shaqyrady, dep habarlaıdy QazAqparat tilshisi.
«2019 jyldyń 9-10 qańtarynda respýblıka boıynsha ys tıip jáne tabıǵı gazdan ýlanyp, segiz adam mert boldy jáne 9 adam aýrýhanaǵa jetkizildi. Qaıǵyly oqıǵalar qatty otynmen jáne tabıǵı gazben, gaz kolonkasymen jylytý kezinde aqaý saldarynan bolǵan», - delingen QR ІІM TJK baspasóz qyzmeti.
Qutqarýshylardyń deregi boıynsha, órt qaýipsizdigi erejeleri pesh qurylymyndaǵy jaryqtardan, tútindiktiń bitelip qalýynan, aqaýy bar pesh jáne gaz qurylǵylaryn paıdalanýdan jáne t.b. buzylady.
Jylý maýsymynyń basynan beri respýblıkanyń turǵyn úı sektorynda ysty gazdan ýlaný boıynsha 36 adam mert bolsa, 93 adam jaraqat alǵan. Tabıǵı gazdan ýlanyp 17 adam qaza tapsa, 24 adam jaraqat alǵan.
