Eki kúnde eki ólim: Oralda jol apattary boıynsha qylmystyq is qozǵaldy
ORAL. QazAqparat - Oralda kisi ólimine soqtyrǵan jol apattary boıynsha tergeý júrgizilýde, dep habarlaıdy QazAqparat tilshisi.
BQO Іshki ister departamentiniń baspasóz qyzmetinen túsken málimetke qaraǵanda, 3 maýsym kúni saǵat 05.30-da «VAZ-2170» avtokóliginiń júrgizýshisi Jáńgir han kóshesimen kele jatyp, rýlge ıe bola almaı, «Neftek» janar-jaǵar maı quıý stansasynyń aqparattyq stendine soǵylǵan.
Sonyń saldarynan avtokólikte otyrǵan 1997 jylǵy jolaýshy oqıǵa ornynda qaza tapty. 1991 jylǵy júrgizýshi men 1998 jyly týǵan taǵy bir jolaýshy túrli jaraqattarmen qalalyq kópbeıindi aýrýhanaǵa jetkizildi.
Sondaı-aq 4 maýsym kúni saǵat 04.00-de «Volkswagen Passat» kóliginiń júrgizýshisi dál sol Jáńgir han kóshesinde jol qozǵalysy qaýipsizdigin saqtamaı, velosıped mingen 1991 jylǵy turǵyndy qaǵyp ketti. Ol da oqıǵa ornynda kóz jumdy.
Qazirgi kezde qaıǵyly oqıǵalar boıynsha QR QK 345-baby 3-bóligine sáıkes (abaısyzda kisi ólimine soqtyrǵan jol qozǵalysy erejesin buzý) qylmystyq is qozǵalyp, sotqa deıingi tergeý amaldary bastaldy.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, 1998 jylǵy turǵynǵa ota jasalyp, beti beri qarady, ol jansaqtaý bóliminen jaraqat bólimine aýystyryldy. 1991 jylǵy turǵyn da jaraqat bóliminde.
