Eki kún qatarynan Taraz qalasyndaǵy №31-shi mektepke jarylǵysh zat qoıyldy degen anonımdi habar alyndy
ASTANA. Qyrkúıektiń 29-y. QazAqparat - Eki kún qatarynan Taraz qalasyndaǵy №31-shi mektepke jarylǵysh zat qoıyldy degen anonımdi habar alyndy. Osy eki kún boıy mektepte shuǵyl áreket etý qyzmetteriniń barlyǵy 120-dan astam mamany jumys istedi.
Bul týraly Qazaqstannyń Tótenshe jaǵdaılar mınıstrliginen habarlady.
Buǵan deıin habarlanǵandaı, qyrkúıektiń 27-si kúni tańerteńgi saǵat 9-da, Tótenshe jaǵdaılar departamentiniń kezekshi bólimine Tóńkeris kóshesinde ornalasqan №31-shi mektep ǵımaratyna jarylǵysh zat qoıyldy degen anonımdi habar kelip tústi. Aqparat alynysymen, tótenshe jaǵdaıdy joıýǵa jedel áreket etý qyzmetteriniń 50 adamy men 14 tehnıkasy shuǵyl jóneltildi. Júrgizilgen arnaıy is-sharalardan keıin jarylǵysh zat tabylmady.
Keshe, qyrkúıektiń 28-i kúni tańerteńgi saǵat 08.46-daTótenshe jaǵdaılar departamentiniń kezekshi bólimine taǵy da anonımdi qońyraý shalynyp, atalmysh №31-shi mektepke jarylǵysh zat qoıylǵandyǵy týraly aıtqan. Qońyraýdan keıin shuǵyl áreket etý qyzmetteriniń 71 adamy men 14 tehnıkasy dereý «kóterildi».
Mektepten 560 adam qaýipsiz jerge kóshirildi. Arnaıy is-sharalar barysynda bul joly da jarylǵysh zat tabylmady.
