Eki kún buryn joǵalǵan 47 jastaǵy azamattyń denesi Syrdarııadan tabyldy

QYZYLORDA. QazAqparat - Qyzylorda qalasynda 47 jastaǵy azamattyń denesi eki kúnnen keıin Syrdarııa ózeninen tabyldy, dep habarlaıdy QazAqparat tilshisi.

Ol 14 maýsymnan beri habarsyz ketken. Súńgýirler 15 maýsymda 13.00-ten bastap Syrdarııa ózeniniń tómengi aǵysynan 1,2 shaqyrym aralyqta izdeý jumystaryn júrgizdi.

«Qutqarýshylar Talsýat eldi mekenine deıin motorly qaıyqpen sý betimen 15 shaqyrym aýmaqty qarap shyqty. Sondaı-aq«ıAgodka» saıajaıyna izdestirý júrgizildi. Ol kúni 20.33 mınýtta izdestirý sharasy ýaqytsha toqtatyldy. Bul jumystar 16 maýsymda tańǵy saǵat 05.30-dan bastap qaıta jalǵasty. Nátıjesinde saǵat 16.30-de onyń máıiti sýdan shyǵarylyp, týystaryna tabystaldy», - dep málim etti oblystyq Tótenshe jaǵdaılar departamenti órt sóndirý jáne avarııalyq qutqarý jumystary qyzmetinen.

Vedomstvo málimetinshe, izdestirý jumystaryna barlyǵy 15 adam men 6 avtokólik, onyń ishinde oblystyq Tótenshe jaǵdaılar departamentinen 8 qutqarýshysy men 3 tehnıka jumyldyryldy.

Jyl basynan beri oblycta 19 adam sýǵa ketken. Onyń 13-i bala. Qyzylordada jyl basynan beri 15 adam sýǵa batyp ketti.