Eki qolynan aıyrylǵan oqýshy oqıǵasy úshin aıyptalǵandar aqtalyp shyqty
AQTÓBE. QazAqparat - Aqtóbede transformatorǵa kirip, tokqa túsken oqýshy isine qatysty sot úkimi shyqty, dep habarlaıdy QazAqparat tilshisi.
Aqtóbeniń Shalqar aýdanynda oqys oqıǵa tirkelip, transformatorǵa kirgen oqýshy eki qolynan aıyrylǵan bolatyn. Keıin oqýshynyń anasy protez úshin halyqtan kómek surady. Osy oqıǵaǵa baılanysty Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmet kórsetý» baby boıynsha is qozǵaldy. Qylmystyq is boıynsha sot aldynda mektep dırektorynyń sharýashylyq jónindegi orynbasary Aısáýle Shohanova, elektrık Asqar Isataev jaýap berdi.
«Aısaýle Shohanova men Asqar Isataev QR QK-niń 306-babynyń 1-bóligimen kinásiz dep tanylyp, olardyń áreketinde qylmystyq teris qylyq quramynyń bolmaýyna baılanysty aqtalsyn», - dedi sýdıa O.Baqtygereev.
Іs materıalyna súıensek, ótken jyldyń 5 qazan kúni saǵat 14:25 shamasynda mektep-gımnazııa aýlasynda oınap júrgen Damır Fatkýlın transformator qurylǵysy ornatylǵan ǵımarattyń 2-qabatyna temir satymen kóterilgen. 10 kVt tok jelisi júrgizilgen qoımaǵa qulyp salynǵan, biraq temir esiktiń tabaldyryq bóligi 70h25sm ashyq boldy. Sol sańylaýdan kirgen oqýshy alıýmınıı metalmen júrgizilgen 3-qatarly «A,V,S» fazalardy baıqaǵan. A fazasy sary túspen, V fazasy jasyl túspen, S fazasy qyzyl túspen belgilengen jáshik esigin emin-erkin ashyp, ishine kirip, sary túspen belgilengen A fazasyn oń qolymen, jáshiktiń ishin sol qolymen ustaǵan. Osy kezde onyń eki qol, eki bilek, eki ıyq, aldyńǵy keýde, sol jaq tize býyny, oń jaq aıaǵynyń basy kúıip qalady.
Sot úkimi zańdy kúshine engen joq.
