Eki qoly joq aqtóbelik qus sharýashylyǵyn damytyp otyr

AQTÓBE. QazAqparat – Aqtóbe oblysy Shalqar qalasynda turatyn Taıbek Ótegenov eki qolynan aıyrylsa da, isin endi bastaǵan aýyldastaryna balapan satyp otyr. «Aýyl amanaty» jobasy qolǵa alynǵanda tapsyrys artyp, bıyl 30 mln teńge tabys tapty, dep habarlaıdy QazAqparat tilshisi.

І toptaǵy múgedektigi bar Taıbek Ótegenov sońǵy jyldary eńbekqorlyǵymen kópti tańǵaldyryp júr. 40-tan asqan azamat áskerden oralǵan soń joǵary voltty elektr togyna túsip, eki qolynan aıyrylǵan. Alǵashynda tórt qabyrǵaǵa qamalyp, qamyqty, qaıǵyrdy. Bul qıyndyq 10 jylǵa sozyldy. Keıin bir-aq sátte bastan keshken oqıǵa onyń jigerin janyp, ómirge qaıta qulshynys syılady. Sóıtip, on eki múshesi saý adamdarmen teń otyryp, isin bastady. Onyń qazirgi tirligi kópke úlgi. Aqyl-keńes surap keletinder kóp.

«2018 jyly 500 myń teńge qaıtarymsyz grant aldym. Bıznesti damytý baǵdarlamasyna qatysyp, taǵy da qaıtarymsyz 2 mln teńge qarjy ıelendim. Sodan beri qus sharýashylyǵymen aınalysyp kelemin. Aldymen 40-50 balapan shyǵaratyn apparat satyp aldym. Al qazir 21 kúnde myń dana balapan shyǵarýǵa múmkindik beretin apparat bar. Negizi biz osy kúnge daıyndyqty bıyl qańtarda bastadyq. Óńirde «Aýyl amanaty» jobasy bastalǵanyn bilemiz. Al ondaǵy eń tıimdi baǵyt – qus sharýashylyǵy. Sondyqtan aılar boıy balapan jınap, kóktem-jazda sattyq. Tabysymyz 30 mln teńgeden asty», - dedi Taıbek Ótegenov.

Onyń aıtýynsha, ınkýrabor apparaty qazir óte tabysty bızneske aınalǵan. Eger myń dana balapan bolsa, onyń teń jartysyn satady. Qalǵanyn ósirip, taýyq suraǵandarǵa saýdalaıdy. Sonymen birge balapan baǵýǵa arnalǵan jáshik te jasap shyǵara alady.

«Elge adal qyzmet etý – armanym. Jalpy, jumys isteımin degen adam eki qoly bolmasa da, iske kirisedi. Qazir ózim sholaq qolymmen kese ustap, shaı ishemin, kólik te júrgizemin. Qudyqtan shelekpen bir tonna sý tarta berem. Qazir saırap turmyn-aý. Bul eptiligim úshin biraz ter tóktim. Qolymnyń kesilgenine 20 jyl boldy. Men 20 jasymda qos qolymnan aıyryldym. Aýylda júrgen kezde óristen qoı keldi. Aǵam aýyryp jatyp, jaǵdaıy bolmady. Janymnan ótip bara jatqan jigitten malǵa sý quıyp jiberýin ótindim. Biraq ol «men úshin mal jınaısyń ba?» dep qaıyrylmaı ketti. Osy jigittiń sózi janyma batty. Qolymnan is keletinin dáleldemek bolyp, sol jerde shelekti qudyqqa saldym. Bir kese ustaý úshin bir jyl, sý quıý úshin 2 jylyn sarp etken adammyn», - dedi Taıbek Ótegenov.

Onyń janynda otbasy bar. Aýyldaǵy sharýashylyqta aǵa-jeńgesi otyrsa, ózi qalada balapan shyǵarady. Inkýbator apparatynan shyqqan balapandy aýylǵa jiberip, qajettisin qalaǵa aldyryp, qaıta satady. Úılengen. Eki balanyń ákesi.

«Kezinde 12 múshesi saý adamdardy basyp ozsam dep edim, ozdym. Adam eńbek etýi kerek», - dedi ol.