Eki qoly kúlge aınalǵan oqýshy jasandy tynys alý apparatyna qosyldy
AQTÓBE. QazAqparat - Aqtóbede Shalqar qalalyq mektep-gımnazııasynyń 4-synyp oqýshysy tokqa túsip, eki qolynan aıyryldy. Balanyń anasy mektep ákimshiliginiń salǵyrttyǵy týraly aıtyp berdi, dep habarlaıdy QazAqparat tilshisi.
Aqtóbede 4-synyp oqýshysy jansaqtaý bóliminde jatyr. Aqtóbe oblystyq balalar aýrýhanasynyń dárigerleri ota jasap, baldyrǵannyń eki qolyn ıyǵynan kesip tastady. Sebebi, 10 myń volttyq transformator qas-qaǵym sátte súıekti kúıdirip jibergen.
«Barǵan kezde balam baqyryp jylap jatty. Alǵashynda meni jaqyndatpady. Eki qoly kúıip, súıegi kúlge aınalǵan. Kıimderi de túgel kúıip ketip, dárigerler sheshindirdi. Sóıtip Shalqar qalasynda eki kún boıy jatyp, sanavıatsııamen ortalyqqa ákeldi. Balam tiri, eki qoly aman qalmaıtyny birden kórinip turdy. Balam esin biledi, bárin surap, izdep jatty»,- deıdi oqýshynyń anasy Gúlmıra Faktýlına.
Oqýshynyń anasy balasynyń kúıip qalǵanyna mektep ákimshiligin kinálap otyr.
«Balamnyń qoly joq bolsa da, ózi bar. Aman qalmasa ne ister edik? Qazir tranformatordyń jan-jaǵyn qorshap, jaýyp qoıǵan. Ol jer únemi baqylaýda bolýy tıis edi»,- deıdi Gúlmıra Faktýlına.
Aqtóbe oblystyq balalar aýrýhanasy otadan soń balanyń jaǵdaıy aýyr dep otyr.
«Bul - aýyr ota. Sondyqtan bala jasandy tynys alý apparatyna qosyldy. Qazir jaǵdaıy turaqty aýyr. Biz 9 jasar balany únemi baqylap otyrmyz»,- deıdi aýrýhananyń anestezıolog-reanımotology Elena Andreeva.
