Eki qazaqstandyq telearna Gennadıı Golovkın men Osýmaný Adamanyń jekpe-jegin kórsetedi
ASTANA. QazAqparat - WBA jáne IBO nusqalary boıynsha orta salmaqtaǵy bokstan álem chempıony qazaqstandyq Gennadıı Golovkın óz ataǵyn saqtap qalýy úshin ganalyq Osýmaný Adamamen jekpe- jekke shyǵady, dep habarlady Vesti.kz. tilshisi.
Kezdesý Monakoda ótedi, jekpe-jekti otandyq eki arna «Qazaqstan» jáne KazSport tikeleı efırden kórsetedi. Golovkın men Adamanyń qolǵap túıistirýi boksshylar keshiniń basty oqıǵasyna aınalady: sharshy alańǵa qarsylastar aqpannyń 1-inen 2-ine qaraǵan túni, saǵat 2-den 3-ke deıingi aralyqta shyǵady. Sonymen qatar, KazSport efırde saǵat 22.40-ta bastap básekelerdi túgeldeı kórsetýdi josparlap otyr. Al «Qazaqstan» arnasy Astana ýaqyty boıynsha saǵat 2.30-da tek qazaqstandyqtyń qatysýymen ótetin aıqasty ǵana kórsetedi.
Aıta keteıik, oıyn aldynda salmaqtary ólshendi: eki sportshynyń da salmaǵy 72,2 kg (159,2 fýnt) bolyp teń tústi. Qazaqstandyq úshin bul óz mansabyndaǵy 29-shy kezdesý: ol 28 ret jeńiske jetken, 25-i - nokaýt. Ganalyq 33-jasar boksshy 25 ret jekpe-jekke shyǵyp, qarsylasyn 16 ret sulatyp salǵan.
Eske sala keteıik, Golovkın óziniń osynyń aldyndaǵy aıqasynda amerıkalyq Kertıs Stıvensti nokaýtqa jiberip, merziminen buryn aıaqtaǵan edi.
