Eki «katıýshamen» jaýdyń 60 tankisin qırattyq - soǵys ardageri Jaqan Seısebaev

NUR-SULTAN. QazAqparat - Búgin elordada Jeńis kúniniń 76 jyldyǵyna oraı Uly Otan soǵysy ardageri Jaqan Seısebaevty quttyqtaý rásimi ótti, dep habarlaıdy QazAqparat tilshisi.

Jaqan Seısebaev 1925 jyly 10 naýryzda dúnıege kelgen. Belorýssııany azat etý shaıqasyna qatysyp, úsh jerden jaraqat alǵan. Jeńis kúnin Kenıgsbergte qarsy alǵan. Odan keıin sovet-japon soǵysyna qatysyp, elge 1948 jyly oralady.

«Ózim burynǵy Taldyqorǵan oblysy, Kırov aýdany, Qarabulaq aýylynda dúnıege kelgenmin. 17 jasymda soǵysqa attandym. Surapyl soǵysta bastan kóp oqıǵa ótti. Birde jaýdyń 60 tankisi shekaradan ótip ketkeni týraly habar keldi. Eki «katıýshany» daıyndap, úsh shaqyrym jer qalǵanda tankilerdi atý kerek boldy. Bir «katıýshanyń» tizgininde men boldym. Oq jaýdyryp, 60 tankiden 1 tanki ǵana aman qaldy», - deıdi soǵys ardageri Jaqan Seısebaev.

Ol Jeńis kúnin qalaı qarsy alǵanyg esine aldy.

«8 mamyr kúni biz Shyǵys Prýssııada boldyq. Jeńiske jetkenimizdi estigen kezde bir jylap, bir kúlip, qushaqtasyp, jaýyngerler bir-birimizdi quttyqtadyq. Odan keıin Japon soǵysyna attandym. Ol aıaqtalǵan soń Soltústik Koreıaǵa soǵysqa attandym. Úsh soǵystan aman qaldym. Qazirgi ýaqytta 1 ul, 3 qyzymnan 9 nemere, 14 shóbere súıip otyrmyn. Beıbit kúnde ómir súrip jatqan urpaqqa baqyt tileımin. Meniń jasymdy bersin!», - deıdi ol.

Shara Memlekettik kúzet qyzmetiniń «Aıbyn» prezıdenttik polkiniń jáne Memlekettik qaýipsizdik qyzmetiniń prezıdenttik orkestriniń súıemeldeýimen ótti.