Eki qalada Nazarbaev Ýnıversıteti úlgisinde oqý oryndary qurylmaq
«Nazarbaev Ýnıversıteti joǵary oqý orny retinde qalyptasyp, óziniń nátıjesin kórsetip otyr. Bul oqý ornynyń modeli óziniń tıimdiligin dáleldedi. Osyǵan baılanysty Nazarbaev Ýnıversıteti tájirıbesine súıene otyryp, Petropavl men Shymkent osy tektes joǵary oqý oryndary bolady degen sheshim shyǵaryldy», - dedi Mıras Dáýlenov Ortalyq kommýnıkatsııalar qyzmetinde.
Onyń aıtýynsha, bul JOO-lar tıisti derbestigimen erekshelenedi. Olarda daıyndyqtyń birneshe baǵyty qamtylady, sonyń arasynda tehnıkalyq ári gýmanıtarlyq salalar eskeriledi.
«Josparda osy JOO-lar úshin jeke korpýstardyń, jataqhanalardyń qurylystary qarastyrylǵan. Qazirgi kezde seriktestermen strategııa boıynsha belsendi jumystardy atqaryp jatyrmyz. Nazarbaev Ýnıversıtetiniń modelin taratamyz, ıaǵnı ony Petropavl men Shymkenttiń úlgisinde kórsetemiz», - dedi vıtse-mınıstr.
Eske salsaq, jaqynda Májiliste «Nur Otan» partııasynyń saılaý aldyndaǵy mindettemelerin iske asyrýǵa arnalǵan talqylaý kezinde Premer-Mınıstr Asqar Mamın 2022 jyly Nazarbaev Ýnıversıtetiniń tájirıbesi boıynsha Petropavl jáne Shymkent qalalarynda 2 ozyq óńirlik joǵary oqý orny qurylatynyn aıtty.
