Eki qalada 8 sport alańy ashylady
ASTANA. QazAqparat - QR Ulttyq Olımpıada komıtetiniń bastamasymen Qyzylorda men Taraz qalalarynda Street Workout-qa arnalǵan 8 sport alańy salynyp jatyr, dep habarlaıdy QazAqparat tilshisi komıtettiń baspasóz habarlamasyna silteme jasap.
Qyzylorda qalasyndaǵy alańdar «Mereı» shaǵyn aýdanynda, Tasbóget pen Tıtov kentinde, M. Eralıev atyndaǵy mádenıet úıiniń janynda, S. Maıhanov pen ortalyq alańdarda ashylady. Al Tarazdaǵy alańdar Qoıbaqov kóshesinde, 12-shi shaǵyn aýdanda («Astana», 19-úıdiń aldynda), 7-shi shaǵyn aýdanda («Samal», 24-úıdiń aýlasy) jáne «Shóldara» turǵyn úı alabyndaǵy Molodejnyı kóshesinde bolady. Kelesi aıda atalǵan alańdardyń barlyǵyn ashý josparlanyp otyr.
Aıta keteıik, ótken jyly QR Ulttyq Olımpıada komıtetiniń bastamasymen Astana, Almaty, Aqtóbe, Aqtaý, Jańaózen men Shymkentte ashyq aspan astyndaǵy 16 sport alańy ashylǵan bolatyn. Statıstıkaǵa sáıkes, bir aıdyn ishinde ondaı alańdarda shamamen 2 myń adam jattyǵady.
